Qur'ān-e-Ḥakīm ki Tilāwat

Baharhaal shab wa roz Maah-e-Ramadaan ke behtareen a'maal mein Qur'ān-e-Ḥakīm ki tilāwat bhi hai. Lehaza zyada se zyada us ki tilāwat kare kyunke woh isi maheenah mein naazil hua hai aur riwayat mein hai ke har cheez ki ek bahaar hoti hai aur Qur'ān ki bahaar Maah-e-Ramadaan hai. Doosre maheenon mein poore maheenah mein ya kam se kam chheh roz mein ek khatm-e-Qur'ān sunnat hai magar Maah-e-Ramadaan mein har teen din mein ek khatm-e-Qur'ān sunnat hai bal ke agar rozana khatm kar le to aur zyada behtar hai. Allama Majlisi ra ne farmaya hai ke ba'z hadeeson mein hai ke ba'z Aimma Ramadaan mein chaalees Qur'ān bal ke us se zyada padha karte the aur agar har khatm-e-Qur'ān ka sawaab chahār-dah Ma'soomeen a.s. mein se kisi ki rooh ko hadiya kar de to sawaab aur bhi do chand ho jaayega. Riwayat se yeh bhi ma'loom hota hai ke us ke sawaab mein woh roz-e-qiyaamat unheen hazraat ke saath rahega. Is maheenah mein du'a, salawaat aur istighfaar bhi zyada karna chahiye aur "Lā ilāha illallāhu" bahut zyada kehna chahiye ke riwayat mein hai ke Imam Zainul Aabideen Alaihissalam Maah-e-Ramadaan daakhil hone ke baad siwaaye du'a, tasbeeh, istighfaar aur takbīr ke koi kalaam nahin karte the aur is maah mein 'ibaadat aur naafila shab wa roz ka behtareen ehtemaam hona chahiye.