Shab Sattrah

Shab Sattrah. Intehaai mubaarak raat hai. Is shab mein lashkar-e-Islam ne lashkar-e-kuffār se Maqaam-e-Badr mein saamna kiya aur us ke din mein Jang-e-Badr waaqi' hui jis mein Parwardigaar ne Rasool-e-Akram (S) ko mushrikon par fateh 'inaayat farmaai jo Islam ki azeem tareen fateh thi. Isi se ulamaa ne farmaya hai ke is din mein roza, sadqa, shukr-e-Khuda, ghusl aur ibaadat wagherah anjaam de jo shab mein bhi fazeelat rakhti hai.

Mu'allif ka bayan hai ke Shab-e-Badr ke riwaayaat mein waarid hua hai ke Rasool-e-Akram (S) ne Shab-e-Badr apne aṣḥāb se farmaya ke "Kaun hai jo jaa kar Chāh-e-Badr se paani le aaye taa ke hum sab sairaab hon." Aṣḥāb ne sukūt kiya aur kisi mein himmat nahin paida hui to Ameer-ul-Momineen a.s. ne mashkeezah uthaaya aur paani ki talaash mein nikal pade. Raat intehaai sard thi aur tez hawa'ein chal rahi thin. Andheri raat mein Aap kunwein ke paas pahunche. Kunwaan bhi kaafi gehra tha aur andhera. Aap ke paas koi ḍōl bhi nahin tha jis ke zariye paani nikaal sakte chunanche Aap kunwein mein utre aur mashkeezah ko bhar liya. Le kar Rasool-e-Akram (S) ki taraf chale. Achānak tez hawaa chali aur Aap baith gaye. Jab hawaa ka zor kam hua to phir chale aur phir dobaarah tez aandhi chali to phir baith gaye aur phir uṭh kar chale aur teesri martaba phir waise hi waaqi'a pesh aaya yahan tak ke Aap ne apne ko Rasool-e-Akram (S) tak pahuncha diya. Hazrat ne farmaya ke "Ya Abul Ḥasan tum ne badi der laga di." Arz ki ke "Teen martaba aandhiyon ka zor saamne aaya aur main laraz gaya. Lehaza us ke zor ke ghaṭne ka intezaar karta raha." Farmaya "Kya tumhein ma'loom hai ke yeh kya tha?" Arz ki "Huzoor behtar jaante hain." Farmaya "Pehli martaba Jibreel the jo hazaar farishton ke saath tumhein salaam karne aaye the. Us ke baad Mīkā'īl hazaar farishton ke saath aaye the aur tum ko salaam kar rahe the. Us ke baad Isrāfīl hazaar farishton ke saath aaye aur sab ne tum ko salaam kiya. Yeh sab aaj hamari madad ke liye aaye the."

Mu'allif ka bayan hai ke isi nuqta ki taraf us shakhs ne ishaara kiya hai jis ne yeh kaha hai ke Ameer-ul-Momineen a.s. ke liye ek raat mein teen hazaar teen fazeelatein thin aur isi waaqi'a ki taraf Sayyid Ḥimyarī ra ne apne qasīdah mein ishaara kiya hai.