4. Shaykh Kulaini rahmatullahi 'alayhi ne hi Imam Ja'far Sadiq 'alayhissalaam se riwaayat ki hai ke mere waalid farmaate the ke Qul Huwa Allahu Ahad tihaa'i (1/3) Quraan hai aur Qul Yaa Ayyuhal Kaafiroon chauthaa'i (1/4) Quraan hai.
5. Hazrat Moosaa Kaazim 'alayhissalaam se manqool hai ke jo shakhs sone se pehle Aayat-ul-Kursi paṛh le woh faalij se na ghabraaye aur agar namaaz ke ba'd paṛh le to use koi zehr nuqsaan na pahuñcha sake ga.
Aur farmaaya ke jo shakhs kisi zaalim wa jaabir ke paas jaane se pehle Qul Huwa Allahu Ahad paṛhe ga to Khuda-e-'Alam is Surah ki barkat se use us ke shar se mehfooz rakhe ga aur us ke saamne, peeche aur daayeñ baayeñ har taraf se us ki hifaazat kare ga aur jo shakhs bhi aisa kare ga Khuda-e-'Alam use khair 'ataa kare ga aur use har shar se mehfooz rakhe ga.
Aur dekho jab bhi tum kisi cheez se khaufzadah ho to kisi bhi jagah Quraan-e-Majeed ki sau (100) aayaat ki tilaawat kar lo aur us ke ba'd teen martaba kaho:
اَللّٰهُمَّ اكْشِفْ عَنِّى الْبَلَاۤءَ
Ay Ma'bood! Meri museebat door kar de!
6. Shaykh Kulaini rahmatullahi 'alayhi ne Imam Ja'far Sadiq 'alayhissalaam se riwaayat ki hai ke jo shakhs bhi Khuda-e-'Alam aur Qiyaamat par imaan rakhta hai use chaahiye ke har waajib namaaz ke ba'd Qul Huwa Allahu Ahad paṛhna tark na kare aur jo shakhs bhi ise paṛhe ga Khuda-e-'Alam us ke liye dunya wa aakhirat ki nekiyaa ñ jama' kar de ga aur use, us ke walidain aur un ki awlaad ko bakhsh de ga.
7. Imam Ja'far Sadiq 'alayhissalaam se riwaayat hai ke jo shakhs Surah Alhaakumut Takaasur ko sone se pehle paṛh le ga to use 'azaab-e-qabr se mehfooz rakha jaaye ga.
