Ta'qibaat-e-Namaz-e-Subh (2)

Namaaz-e-Subh ki Ta'qibaat doosri tamaam namaazon se zyada hain. Aur khaas taur se in Ta'qibaat ki fazeealat mein ahaadees bahut zyada hain.

Hazrat Ameer-ul-Mo'mineen Alaihis Salaam se manqool hai ke Namaaz-e-Subh ke ba'd Tulu'-e-Aaftaab tak Zikr-e-Khuda karna rozi ke husool ke liye safar karne se zyada behtar hai aur Rasool-e-Akram (S.A.W.) se manqool hai ke jo shakhs Tulu'-e-Fajr se Tulu'-e-Aaftaab tak musalle par baitha Ta'qibaat mein mashghool rahe Khudaawand-e-Aalam use Aatish-e-Jahannum se mehfooz kar dega.

Aur Imam Muhammad Baqir Alaihis Salaam se manqool hai ke Shaitaan din ke lashkar ko Tulu'-e-Subh se lekar Tulu'-e-Aaftaab tak har taraf phaila deta hai aur raat ke lashkar ko Ghuroob-e-Aaftaab se lekar Maghrib ki jaanib aasmaan ki surkhi zaa'il hone tak phaila deta hai.

Lehaza in dono auqaat mein Khudaawand-e-Aalam ko zyada yaad karo ke in auqaat mein Shaitaan insaan ko Zikr-e-Khuda se ghaafil bana deta hai.

Saheeh sanad ke saath manqool hai ke Imam Raza Alaihis Salaam jab Khuraasaan mein Namaaz-e-Subh padhte the to Tulu'-e-Aaftaab tak musalle par baithe Ta'qibaat mein mashghool rehte the. Phir Hazrat (A.S.) ke liye ek thaili laayi jaati thi jismein Miswaak rehti thi to Aap (A.S.) har ek Miswaak se Miswaak karte the. Phir thoda sa kundur chabaate the aur phir Quraan-e-Majeed ki Tilaawat karte the.

Aur Rasool-e-Akram (S.A.W.) se manqool hai ke jo shakhs Tulu'-e-Subh Saadiq se lekar Tulu'-e-Aaftaab tak Ta'qeeb mein mashghool rahega uske liye ek Hajj ka sawaab likha jaayega aur Hadees Qudsi mein hai: Khudaawand-e-Aalam farmata hai ke Aye Aulaad-e-Aadam! mujhe subah ke ba'd ek saa'at tak aur Asr ke ba'd ek saa'at tak yaad kiya karna taa ke main tere tamaam ahem kaamon ke liye kaafi ho jaaoon.

Subh Ki Makhsoos Ta'qibaat

1. Ibn Baabawiyah (R.A.) ne saheeh wa mo'tabar sanad ke saath Imam Muhammad Baqir Alaihis Salaam se riwaayat ki hai ke jo shakhs Namaaz-e-Subh ke ba'd sattar baar

Astaghfirullaha Rabbiy wa Atoobu Ilaih padhega Khudaawand-e-Aalam usko bakhsh dega chahe us din woh sattar hazaar gunaah kyun na kar chuka ho. Aur doosri riwaayat mein saat sau gunaahon ka zikr hai.

2. Ibn Baabawiyah (R.A.) ne saheeh aur mo'tabar sanadon ke saath Hazrat Ameer-ul-Mo'mineen Alaihis Salaam se riwaayat ki hai ke jo shakhs Namaaz-e-Subh ke ba'd giyaarah martaba Surah Qul Huwallahu Ahad padhega us din uska koi gunaah Shaitaan ki naak ragadne ke liye na likha jaayega. Balad-ul-Ameen mein Rasool-e-Akram Sallallahu Alaihi wa Aalihi wa Sallam se riwaayat hai ke jo shakhs din mein das baar Surah Qul Huwallahu Ahad padh lega Shaitaan chahe jitni koshish kare uska koi gunaah na likha jaayega.

3. Shaikh Kulaini (R.A.) ne saheeh sanad ke saath Imam Ja'far Sadiq (A.S.) se riwaayat ki hai ke jo shakhs Namaaz-e-Subh ke ba'd sau martaba kahe: