Hikaayat Haaji Ali Baghdadi

Haaji Ali Baghdadi ki Imam-e-Zamana 'ajjallalahu se Mulaqaat

Mu'allif: Is maqaam par munaasib hai ke mard-e-momin saaleh muttaqi Haaji Ali Baghdadi ki hikaayat ko naql kar diya jaaye jis ko hamare ustaad ne Jannat-ul-Ma'waa aur Najm-us-Saaqib mein naql kiya hai aur Najm-us-Saaqib mein farmaya hai ke agar is kitaab mein sirf yahi ek mo'tabar hikaayat hoti jo abhi zamaana-e-haal hi mein waaqi' hui hai to us ki sharaafat wa nafaasat ke liye kaafi thi. Is ke baad chand maqaamaat ke baad bayan kiya hai ke Haaji Ali Baghdadi se naql kiya gaya hai ke mere zimma assi 80 tomaan maal-e-Imam jama' ho gaye the to maine Najaf Ashraf jaa kar bees tomaan Janaab 'Alam-ul-Hudaa wat-Taqi Sheikh Murtaza ra ko aur bees tomaan Janaab Sheikh Muhammad Husain ra Mujtahid Kaazimeeni ko aur bees tomaan Sheikh Muhammad Hasan Sharooqi ko de diye aur baaqi bees tomaan mere paas reh gaye jis ke baare mein khayaal tha ke waapas aakar Sheikh Muhammad Husain Kaazimeeni Aal-e-Yaaseen ko pesh kar doonga. Main Baghdad palat kar aaya to maine chaaha ke fauran is qarz ko adaa kar diya jaaye Panjshanbah (Thursday) ke din main Hazraat Kaazimeen a.s. ki ziyarat se musharraf hua aur is ke baad Janaab Sheikh ki khidmat mein haazir hua aur baqiyyah bees tomaan mein se kuch haazir kar diya aur baaqi ke liye wa'da kar liya ke jins ki farokht kar ke adaa kar doonga. Is ke baad Asr ke waqt Baghdad waapsi ka iraada tha ke Janaab Sheikh ne farmaya ke "Wahaan theher jao." Maine uzr kiya ke "Mujhe kaarkhaane ke mazdooron ko mazdoori dena hai" ke hamare yahan ki rasm yeh thi ke haftah bhar ki mazdoori Panjshanbah ki shaam ko di jaati thi. Chunanche main palat kar aaya lekin taqreeban ek tihai raasta tai ho gaya to maine ek Sayyid Jaleel ko Baghdad ki taraf se aate hue dekha. Qareeb aakar unhon ne salaam kiya aur apne haathon ko musaafiha wa mu'aanaqa ke liye badhaaya aur farmaya "Ahlan wa Sahlan." Mujhe seena se laga kar mu'aanaqa kiya aur hum donon ne ek doosre ko bosa diya. Woh sabz ammaama baandhe hue the aur rukhsar mubaarak par ek siyaah til tha. Phir unhon ne theher kar farmaya ke "Haaji Ali khairiyat hai, kahan jaa rahe ho?" Maine kaha ke "Hazraat Kaazimeen a.s. ki ziyarat kar ke Baghdad waapas jaa raha hoon." Farmaya ke "Aaj Shab-e-Juma hai palat chalo." Maine kaha ke "Mere paas gunjaa'ish nahin hai." Farmaya ke "Palat chalo taa ke main gawaahi doon ke tum mere jadd Ameer-ul-Momineen a.s. aur mere doston mein ho aur Sheikh bhi shahaadat dein ke Khuda-e-Ta'ala ne farmaya hai ke woh gawaah qaraar do." Yeh ishaara tha us matlab ki taraf jo mere dil mein tha ke main Janaab Sheikh ra se guzaarish karunga ke mujhe ek tehreer likh dein ke main Ahl-e-Bait a.s. ke chaahne walon mein hoon taa ke main us ko kafan mein rakhoon. Maine arz kiya ke "Aap ko kya khabar? Aur Aap kaise gawaahi denge." Farmaya ke "Jis ka haq us tak pahuncha diya jaaye woh kaise pahunchaane waale ko na pehchaane ga." Maine arz ki ke "Kaisa haq?" Farmaya "Wohi jo tum ne mere wakeel ko diya hai." Maine kaha "Aap ka wakeel kaun hai?" Farmaya "Sheikh Muhammad Hasan." Maine kaha "Woh Aap ke wakeel hain?" Farmaya "Haan woh mere wakeel hain." Aur unhon ne Sayyid Muhammad se kaha tha ke mere dil mein yeh khayaal hua ke is siqa jaleel ne mere naam se bulaaya hai haalaanke main ise nahin jaanta hoon magar phir bhi yeh khayaal ke shaayad yeh mujhe pehchaanta hai aur main bhool gaya hoon. Phir maine apne dil mein socha ke shaayad yeh Sayyid sahm-e-saadaat mein kuch chahta hai aur main chahta tha ke maal-e-Imam mein se us ko de doon. Maine kaha ke "Aye Sayyid mere paas Aap ka kuch haq baaqi reh gaya tha. Maine is mas'ala mein Janaab Sheikh Muhammad Hasan ki taraf rujoo' kiya taa ke Aap ke haq ko ya'ni saadaat ke haq ko un ki ijaazat se adaa kar doon." Woh Sayyid muskaraaye aur farmaya "Haan tum ne mera ba'z haq mere ba'z wukalaa ki taraf Najaf pahuncha diya hai." Maine arz kiya ke "Maine de diya to kya qabool ho gaya?" Farmaya "Beshak." Mere dil mein aaya ke yeh Sayyid ulamaa-e-i'laam ko apna wakeel kehta hai. Yeh baat mujhe bahut badi ma'loom hui to mujhe khayaal hua ke ulamaa haq-e-saadaat wasool karne mein un ke wakeel hain is liye zehen se baat nikal gayi. Unhon ne farmaya ke "Chalo mere jadd ki ziyarat padho." Main palta aur un ka daahna haath mere baayein haath mein tha. Jab raasta mein chale dekha ke daahni taraf ek saaf wa shaffaaf nehr jaari hai aur lem'on, santre aur anaar wa angoor wagherah ke darakht hamare siron par saaya figan the jin par phal lade hue the jab ke un mein se kisi cheez ki fasl nahin thi. Maine poochha "Yeh sab kya hain?" Farmaya ke "Jo shakhs bhi hamare ajdaad ki ziyarat karega us ke liye yeh sab rehta hai." Maine kaha ke "Main ek sawaal karna chahta hoon." Farmaya "Poochho." Maine kaha ke "Sheikh Abdul Razzaaq marhoom jo ek mard-e-mudarris the. Ek din main un ke paas gaya. Dekha ke woh keh rahe hain ke agar koi shakhs dinon mein roza rakhe, raaton ko ibaadat kare, chaalees Hajj aur chaalees Umre baja laaye, Safa wa Marwah ke darmiyaan mar jaaye aur Ameer-ul-Momineen a.s. ke doston mein na ho us ko koi faayda nahin." Farmaya "Wallah sach kaha hai." Is ke baad maine apne rishtedaaron mein ek shakhs ke baare mein poochha. "Kya woh Ameer-ul-Momineen a.s. ke doston mein hai." Farmaya "Beshak woh aur jo bhi tum se ta'alluq rakhta hai." Maine kaha "Huzoor mere liye ek mas'ala hai." Farmaya "Poochho." Kaha ke "Majlis mein padhne waale yeh bayan karte hain ke Sulaimaan A'mash ek shakhs ke paas gaye aur Ziyarat-e-Imam Husain a.s. ke baare mein sawaal kiya to us ne kaha ke bid'at hai. Us ke baad khwaab mein dekha ke ek hawdaj-e-mahfil zameen wa aasmaan ke darmiyaan hai. Poochha ke is hawdaj mein kaun hai? Logon ne bataya ke Janaab Fatima Zahra a.s. aur Khadijat-ul-Kubra a.s. Kehte hain ke yeh kahan jaa rahe hain? Bataya ke Ziyarat-e-Imam Husain a.s. ke liye aaj Shab-e-Juma hai. Is ke baad dekha ke is hawdaj se kuch ruq'e gir rahe hain jin mein likha hai ke"

Kya yeh hadees sahih hai? Farmaya "Yaqeenan." Maine arz kiya "Huzoor kya yeh sahih hai ke jo Shab-e-Juma Ziyarat Imam Husain a.s. kare us ke waaste amaan hai?" Farmaya "Beshak" aur yeh keh kar Aap ki aankhon se aansoo jaari ho gaye. Maine arz kiya ke "Ek mas'ala aur hai" Farmaya "Poochho." Maine kaha "1269 Hijri mein Imam Raza a.s. ki ziyarat ki aur wahaan Arabon mein se ek sehraai Arab ko dekha aur us ki ziyaafat ki aur us se poochha ke Imam Raza a.s. ki ziyaafat kaisi hai?" To us ne kaha ke "Aaj pandrahwaan din hai jab se maine apne Maula ka maal khaaya hai. Munkar Nakeer meri qabr mein mere paas aayen aur mera gosht Hazrat ke khaane se ro'eedah ho." "Kya yeh sahih hai ke Imam Raza a.s. aate hain aur Munkar Nakeer se insaan ko bacha lete hain?" Farmaya "Beshak mere jadd saamne hain." Maine arz ki "Chhoota sa mas'ala aur hai." Farmaya "Poochho." Maine kaha ke "Meri Ziyarat Imam Raza a.s. maqbool hai?" Farmaya "Insha'Allah qabool hai." Maine kaha "Huzoor ek mas'ala aur hai" Farmaya "Bataao?" Maine kaha ke "Maine Haaji Muhammad Husain Bazzaaz Baashi bin marhoom Haaji Ahmad Bazzaaz Baashi kya un ki ziyarat qabool hai jo mere saath raah-e-Mashhad mein the." Banda-e-Saaleh ne farmaya "Haan un ki ziyarat qabool hai." Maine arz kiya "Ek mas'ala aur hai." Farmaya "Bismillah." Maine kaha "Falan shakhs jo Baghdad ka rehne waala hai aur woh hamare saath tha kya us ki ziyarat bhi qabool hai?" Hazrat khaamosh ho gaye. Maine arz kiya "Mas'ala hai." Farmaya "Bismillah." Maine kaha ke "Aap ne kuch suna ya nahin suna, us ki ziyarat qabool hai ya nahin?" Aap ne phir jawaab nahin diya. Haaji mazkoor ne naql kiya hai, yeh chand afraad Baghdad ke sarmaya daar the jo safar mein musalsal lahoo wa la'b mein mashghool the aur woh shakhs bhi unheen mein shaamil ho gaya tha. Phir hum chalte hue ek jagah par pahunche jahan tamam taraf baaghaat the aur Kaazimeen saamne tha aur woh jagah jo sadak se muttasil hai baaghaat se daahni taraf, Baghdad se raasta aata hai aur woh baagh ba'z saadaat ka tha jis ko hukoomat ne sheher mein daakhil kar liya aur is sheher ke ahl-e-taqwa is raasta se guzarnay se parhez karte the. Maine dekha ke woh Janaab isi raasta se jaa rahe hain. Maine arz kiya "Sayyid yeh maal ba'z yateem saadaat ka tha, is mein tasarruf jaa'iz nahin hai." Farmaya "Yeh jagah hamare jadd Ameer-ul-Momineen a.s. aur un ki aulaad ke liye hai jo un ke doston ke liye halaal hai." Is jagah daahni taraf ek baagh tha jo us shakhs ki milkiyat tha jis ko Mirza Haaji kehte the aur woh Ajam ke mash'hoor daulat mandon mein tha jo Baghdad mein saakin tha. Maine kaha "Huzoor kya sahih hai ke log kehte hain ke Mirza Haaji ke baagh ki zameen milkiyat Hazrat Musa bin Ja'far a.s. hai." Farmaya "Tumhein is se kya ta'alluq hai" aur Aap ne jawaab nahin diya. Jab hum Nehr-e-Dajla ke paas pahunche jo is ilaaqa ki seenchaai ke waaste bani thi aur raaste se guzarti hai yahan se do raaste ho jaate the, ek Raah-e-Sultan, ek Raah-e-Saadaat. Hazrat ne chaaha Raah-e-Saadaat se jaayen. Maine kaha ke "Aaiye is Raah-e-Sultan se chalein." Farmaya "Nahin hum apne raasta se jaayenge." Chand qadam nahin badhe the ke hum ne apne ko sahn-e-muqaddas mein kafshdaari ke paas dekha aur koi koocha wa bazaar nazar nahin aaya. Hum daakhil hue Baab-ul-Muraad ki taraf se jo paa'een-e-paa hai aur riwaaq mutahhar mein nahin thehre aur idhn-e-dukhool bhi nahin padha bal ke andar daakhil ho gaye aur Haram ke darwaaza par khade ho kar farmaya. Yeh ziyarat padho. Maine kaha. "Main padhna nahin jaanta." Farmaya "Main tumhare liye padh raha hoon" aur yeh keh kar shuru kiya

Aur isi tarah har Imam a.s. ko salaam karte rahe. Imam Askari a.s. ke salaam ke baad farmaya. Haaji Ali apne Imam-e-Zamana ko pehchaante ho? Maine kaha "Bilkul." Kaha "Phir salaam karo." Maine kaha

Aap muskaraaye farmaya

Phir hum Haram mein daakhil hue. Zareeh ko bosa diya. Farmaya ke "Ziyarat padho." Maine kaha "Padhna nahin jaanta." Farmaya "Main tumhare liye padhoon." Farmaya "Beshak." Farmaya "Kaun si ziyarat padhna chahte ho?" Maine arz ki "Jo ziyarat behtar ho." Farmaya "Ziyarat-e-Ameenullah afzal hai." Phir is ke baad Aap ne ziyarat padhi.

Isi darmiyaan Haram ke chiraagh roshan hue. Maine dekha sham'ein jal rahi hain lekin Haram mein doosra noor misl noor-e-aaftaab dikhaai deta hai jis ke aage saari sham'ein maand pad gayeen lekin mujh par us waqt aisi ghaflat taari thi ke main in ahem baaton ki taraf bilkul mutawajjeh nahin hua. Ziyarat se faarigh hone ke baad paa'een-e-paa se pusht-e-sar aaye aur mashriq ki taraf khade ho gaye. Farmaya ke "Ziyarat-e-Imam Husain a.s. padhoon." Maine kaha "Beshak Shab-e-Juma hai." Aap ne Ziyarat-e-Waarisa padhi. Itne mein mu'azzin ne Azaan-e-Maghrib khatm ki. Farmaya ke "Namaz-e-Jama'at padho." Masjid mein pusht-e-sar-e-Haram Mutahhar jahaan jama'at ho rahi thi fauran gaye aur khade ho gaye Imam-e-Jama'at ke daahni taraf us ke baraabar mein aur safon mein daakhil ho gaye. Jab namaz khatm hui to maine phir un ko na dekha. Is ke baad main baahar aaya. Haram mein bahut talaash kiya aur chaaha ke mulaqaat karoon aur kuch paise de doon aur raat ko apne paas mehmaan rakhoon. Is ke baad samajh mein aaya ke woh Sayyid kaun the aur phir guzhishta aayat wa mo'jizaat ke baare mein sochne laga ke unhon ne mujhe mere naam se pukaara tha haalaanke maine un ko kabhi nahin dekha tha aur unhon ne kaha tha ke mere doston mein hain. Maine kaha ke main shahaadat deta hoon. Phir nehr dekhi, darakht dekhe ghair mausam ke meve dekhe jis se mujhe yaqeen ho gaya ke woh Hazrat Mehdi Alaihissalam the. Khaas taur se jab idhn-e-dukhool mein unhon ne Imam Askari a.s. ke baad Imam-e-Zamana a.s. ke Imam ki ma'rifat ke baare mein sawaal kiya aur mujh se farmaya ke tum sawaal karo aur mere salaam par tabassum farma kar jawaab bhi diya to main daud kar kafshdaari mein aaya aur un ke baare mein sawaal kiya. Us ne kaha ke "Baahar gaye. Kya yeh Sayyid tumhare dost the." Maine kaha ke "Haan." Pas hum mehmaandaar ke ghar aaye aur raat wahaan guzaari. Jab subh hui to Janaab Sheikh Muhammad Hasan ke paas gaye aur is waaqi'a ko bayan kiya to unhon ne apne honton par haath rakha aur farmaya ke "Khabardaar is raaz ko zaahir na karna aur is qissa ko bayan na karna. Parwardigaar-e-Aalam ne tumhein taufeeq di hai." Chunanche maine kisi se izhaar nahin kiya yahan tak ke ek maheenah guzar gaya. Ek din main Haram Mutahhar mein tha ke maine ek Sayyid Shareef ko dekha jo mere paas aaye aur farmaya "Tum ne kya dekha" aur is qissa ki taraf ishaara kiya. Maine kaha "Maine kuch nahin dekha." Phir unhon ne is lafz ki takraar ki. Maine inkaar kiya to woh meri nazron se ghaa'ib ho gaye. Maine phir un ko nahin dekha.