Zuwwaar-e-Madeenah ki Zimmedaariyaan

Mu'allif: Hum ne Kitaab Hadaayat-uz-Zaa'ireen mein zuwwaar-e-Madeenah ki zimmedaariyon ka zikr karte hue yeh bayan kiya hai ke insaan jab tak Madeenah Munawwarah mein rahe is mauqa' ko ghaneemat samjhe aur zyada namazein adaa karne ke liye Masjid mein jaaye ke wahaan ki har namaz das hazaar namazon ke baraabar hai jo doosri jagahon par adaa ki jaayen aur Masjid mein bhi behtareen jagah woh Rauza hai jo Mehraab wa Minbar ke darmiyaan hai. Muhaddith Noori ra ne Tahiyyah mein farmaya hai ke jis jagah par jasad-e-paak-e-Paighambar (S) ya ajsaam Aimma Alaihimussalam hain woh zameen ba-ittifaaq tamaam fuqahaa Ka'ba-e-Mu'azzamah se behtar hai jaisa ke Shaheed ne Qawaa'id mein is ki tasreeh ki hai aur ek riwayat hasan mein Hazrami se manqool hai ke Imam Sadiq a.s. ne mujhe hukm diya ke Masjid-e-Rasool-e-Akram (S) mein zyada namazein adaa karoon jahaan tak mumkin ho aur farmaya ke "Hamesha yeh mauqa' haasil nahin hota." Sheikh Tusi ra ne Tahzeeb mein mo'tabar sanad ke saath Muraazim se naql kiya hai ke Imam Sadiq a.s. ne farmaya ke Madeenah mein roza rakhna aur ustoonon ke paas namaz adaa karna waajib nahin hai bal ke waajib sirf Namaz-e-Panjgaanah aur Maah-e-Ramadaan ke roze hain lekin jo shakhs roza rakhna chahe us ke liye behtareen amal hai. Aur farmaya ke is Masjid Shareef mein ba-kasrat namazein adaa karo jahaan tak mumkin ho ke yeh tumhare liye behtareen amal hai. Aur yaad rakho ke kabhi kabhi aadmi dunya ke kaamon mein hoshiyaar hota hai aur log us ki ta'reef karte hain ke kis qadar hooshiyaar hai lekin waaqi'an behtareen hoshiyaar woh hai jo amr-e-aakhirat mein hoshiyaar ho. Lehaza jahaan tak mumkin ho rozana qabr-e-Paighambar (S) ki ziyaarat karo aur is tarah ba-qadr-e-imkaan Aimma-e-Baqee' a.s. ki ziyaarat karo aur jab Hujra-e-Rasool par nigaah pade Aan Hazrat (S) ko salaam karo jab tak Madeenah mein raho us ki paabandi karo aur apne ko tamaam gunaahon aur ghaliyon se mahfooz rakho aur is muqaddas jagah ki sharaafat wa azmat ke baare mein ghaur karte raho khusoosan Masjid mein baith kar ke yeh woh sar-zameen hai jis par Aan Hazrat (S) ke qadam pade hain aur Aap ne is ko koocha wa bazaar mein aamad wa raft farmaai hai. Is Masjid mein namaz padho ke yeh woh jagah hai jahaan wahi ka nuzool hota tha aur Jibreel aur Malaa'ika-e-Muqarrabeen haazir hua karte the. Sha'ir ne behtareen baat kahi hai

Jahaan tak mumkin ho Madeenah mein aur bil khusoos Masjid mein sadqa do aur khusoosiyat ke saath Saadaat aur durriyyat-e-Paighambar (S) ko jis mein azeem ajr wa sawaab rakha gaya hai.

Allama Majlisi ra ne farmaya hai ke mo'tabar riwayat mein waarid hua hai ke Madeenah mein ek dirham sadqa doosre maqaam par das hazaar dirham ke baraabar hai aur agar mumkin ho to is sheher mein mujaawarat ikhtiyaar karo ke yahan mujaawarat mustahab hai aur us ki fazeelat mein ba-kasrat ahaadees waarid hui hain.