Haaroon ke zamaane mein Qabr-e-Imam Ali a.s. ki Qabr ka zaahir hona

Mu'allif: Mo'tabar riwaayaat se zaahir hota hai ke Parwardigaar ne qabr-e-Ameer-ul-Momineen a.s. aur quboor-e-aulaad-e-Ameer-ul-Momineen a.s. ko khaufzadah logon ki panaah gaah, muztar afraad ka sahaara aur roo-e-zameen ke liye amaan qaraar diya hai ke jo ghamzadah wahaan pahunch jaaye us ka gham zaa'il ho jaata hai aur jo dard ka maara apne ko us jagah mas (touch) kar de use shifa haasil ho jaati hai aur jo wahaan panaah lega use amaan mil jaati hai.

Sayyid Abdul Kareem bin Ta'us ra ne Muhammad bin Ali Sha'baani se riwayat ki hai ke mere waalid aur mere chacha khaamoshi se raat mein Ziyarat-e-Ameer-ul-Momineen a.s. ke liye 260 Hijri mein gaye. Us waqt main bachcha tha magar jab hum log Aan Hazrat ki qabr ke paas pahunche to dekha ke qabr ke chaaron taraf siyaah patthar lage hue hain aur wahaan koi ta'meer nahin hai. Qareeb jaane ke baad hum mein se kisi ne Quran padhna shuru kiya, koi mashghool-e-namaz ho gaya aur koi ziyaarat padhne laga. Is haal mein hum ne dekha ke ek sher hamari taraf aa raha hai. Jab woh ek neza ke faasla tak aa gaya to hum is jagah se door ho gaye to woh sher qabr-e-mutahhar ke paas gaya aur apne ko qabr se mas (rub) karna shuru kar diya. Hum mein se ek shakhs qareeb gaya aur us ne is manzar ko dekha magar sher us ki taraf mutawajjeh nahin hua aur waapas chala gaya. Us ne aakar hum ko in haalaat ki khabar di jis ki bina par hamara khauf door ho gaya aur hum sab qareeb ho gaye aur hum ne is manzar ko apni aankhon se dekha ke us ke haathon mein zakhm hai aur woh us zakhmi haath ko Aap ki qabr se mas kar raha hai. Ek saa'at tak yahi soorat-e-haal barqaraar rahi us ke baad woh chala gaya aur hum phir namaz wa ziyaarat aur qira'at-e-Quran mein mashghool ho gaye. Sheikh Mufeed ra ne naql kiya hai ke ek roz Haaroon Rasheed shikaar ke iraada se Koofa se baahar gaya aur Ghurrbain aur Suwaid ki taraf rukh kiya to wahaan kuch hiran nazar aaye. Us ne hukm diya ke baaz aur shikaari kutton ko chhod diya jaaye aur un hiranon ka shikaar kiya jaaye. Un logon ne yahi kiya aur jab hiranon ne is hamla ko dekha to faraar kiya aur ek bulandi par jaa kar panaah le li aur wahaan aaraam karne lage aur baaz bhi ek jagah par jaa kar theher gaye. Shikaari kutte bhi aage nahin badhe. Rasheed yeh dekh kar hairat mein pad gaya. Dobaarah jab woh hiran bulandi se nasheeb ki taraf aaye to phir baazon ne aur jaanwaron ne hamla kiya aur hiranon ne dobaarah phir us bulandi par panaah le li aur shikaari jaanwar apne iraada se baaz aa gaye. Teesri martaba phir yahi soorat-e-haal pesh aayi aur Haaroon ko sakht hairat hui. Us ne ghulaamon ko hukm diya ke fauran jaayen aur kisi aise shakhs ko laayein jo is jagah ke haalaat se baa khabar ho. Ghulaam gaye aur qabeela-e-Bani Asad ke ek za'eef shakhs ko le kar aaye. Haaroon ne us se sawaal kiya ke yeh bulandi kya hai aur yahan yeh kya kaifiyat paayi jaati hai? Us ne kaha ke agar mere liye amaan ho to main is ka qissa bayaan kar sakta hoon. Haaroon ne Khuda se ahd kiya ke koi aziyat na dega aur woh shakhs amaan mein rahega. To us ne kaha ke "Mujhe mere baap ne apne aabaa wa ajdaad ke hawaala se bataya hai ke is bulandi par Ameer-ul-Momineen a.s. ki qabr hai aur Parwardigaar-e-Aalam ne is ka Haram-e-Amn wa Amaan bana diya hai. Jo shakhs bhi is jagah panaah le lega woh amaan mein rahega."