Kutub Hadees mein Naa-ahalon ka Tasarruf

Mu'allif ka bayan hai ke is Sheikh Jaleel ra ki farmaa'ish par ghaur karna chahiye ke woh Mazaq-e-Shar'i ko khoob pehchaante the aur yeh mas'ala un ke liye is qadar sakht tha ke woh jaante the ke is kaam ke nataa'ij intehaai sangeen honge. Is ke bar khilaaf jo log uloom-e-Ahl-e-Bait a.s. se be-behrah hain aur sirf chand istilaahaat wa alfaaz ke yaad kar lene hi ko kaafi samajhte hain. Un ki nazar mein in baaton ki koi ahmiyat nahin hai. Bahar haal naubat yahan tak pahunch gayi hai ke Misbah-ul-Mutahajjid, Misbah-ud-Da'waat, Jamaal-ul-Usboo', Misbah-uz-Zaa'ir, Balad-ul-Ameen, Junnat-ul-Waqiyah, Miftaah-ul-Falah, Miqbaas, Rabee'-ul-Asaabee', Tuhfah, Zaad-ul-Ma'aad wagherah jaisi kitaabein matrook ho gayeen aur aise ahmaqaanah majmoo'e shaa'i' ho gaye ke jin mein Du'a-e-Mujeer jaisi du'a mein 80 martaba bi-'Afwika kaa izafa kar diya gaya hai aur kisi ne mana' bhi nahin kiya hai aur Du'a-e-Jau shan-e-Kabeer mein sau faslein thin to har fasl ke liye ek khaasaiyat gadh li gayi hai aur ba-kasrat ziyaaraat ke hote hue ek Ziyarat-e-Mufajja'ah bana li gayi hai aur be-shumaar mo'tabar du'aon ke hote hue jin ke mazaameen buland kalimaat par mushtamil the ek Du'a-e-Habbi taiyaar kar li gayeen ke insaan hairan ho kar reh jaaye jin mein se ek fazeelat yeh bhi hai ke Jibreel Ameen ne Rasool-e-Akram (S) tak Maalik ka yeh paighaam pahunchaya ke "Jo banda is du'a ko apne saath rakhega main us par hargiz azaab na karunga chahe mustahiq-e-jahannam hi kyun na ho aur saari zindagi ma'siyat hi mein kyun na guzaari ho aur ek sajda bhi na kiya ho. Main is banda ko sattar hazaar paighambaron ka sawaab doonga aur sattar hazaar shaheed, sattar hazaar namaz guzaar, sattar hazaar barehna logon ko libaas dene waale aur sattar hazaar logon ko sair karne walon ka sawaab ata karunga aur us ka sawaab sehraon ki reet ke baraabar hoga aur sattar hazaar buq'a-e-zameen ka sawaab de doonga aur Rasool-e-Akram (S) ki mohr-e-nabuwwat wa risaalat ka sawaab de doonga aur us ke saath Esa Roohullah, Ibraheem Khaleelullah, Isma'eel Zabeehullah, Musa Kaleemullah, Ya'qoob Nabiullah, Aadam Safiyullah aur Jibreel, Mikaa'eel, Israafeel, Azraa'eel aur tamaam farishton ka sawaab de doonga. Aye Muhammad (S) jo bhi is Du'a-e-Habbi ko padh lega ya apne saath rakhega us ko bakhsh doonga aur mujhe us par azaab karte hue sharm aayegi." Munaasib hai ke insaan in baaton ko sunne ke baad hansne ke bajaaye girya kare ke Shi'a du'aon ki kitaabein is qadar mutqinn thin ke ek se ek kitaab naql ki jaati thi aur ahl-e-ilm un ke naql karne waale hote the aur phir us nuskha se naql ki jaati thin jo ahl-e-ilm ke taraf se tashih shudah aur ulamaa ki taraf se muqaabila ke baad taiyaar hua ho aur agar koi ikhtilaaf ho to haashiya par use bhi likh diya jaaye. Masalan Du'a-e-Makaarim-ul-Akhlaaq mein wa balligh bi-eemaani hai ya masalan falaan kalima Ibn-e-Sikoon ke khut mein is tarah hai aur Shaheed ke khut mein is tarah hai magar ab naubat yeh aa gayi hai ke tamaam kitaab Miftaah-ul-Jinaan par munhasir ho gaya hai jis ke haalaat abhi aap ne mulaahiza farmaaye ke yeh kitaab marja'-e-awaam wa khwaas wa Arab wa Ajam ho gayi hai aur yeh sirf ahl-e-ilm ke hadees wa akhbaar se be-e'tinaai aur ulamaa wa fuqaha-e-Ahl-e-Bait a.s. ki kitaabon ki taraf tawajjeh na karne ka nateeja hai aur nateeja is baat ka hai ke bid'aat, izafaat, tehreef-e-juhalaa aur tasarruf naa-ahlaan ki mukhaalifat nahin ki gayi aur naubat yahan tak pahunch gayi ke sab ne apne apne saleeqa se du'a ziyaarat aur salawaat ijaad kar li aur muta'addid majmoo'a isi tarah se taiyaar kar ke chhaap diye gaye aur Miftaah-ul-Jinaan ke bachche bhi paida ho gaye aur dhheere dhheere yeh kharaabiyaan doosri kitaabon mein bhi daakhil ho gayeen. Misaal ke taur par haqeer ki kitaab Muntaha-al-Aamaal ko haal hi mein chhaapa gaya hai to ba'z logon ne apne saleeqa se is mein bhi tasarruf kar diya hai aur Maalik bin Yasar mal'oon ke haalaat mein is tarah likh diya hai ke Imam Husain a.s. ki baddu'a se us ke donon haath bekaar ho gaye “Alhamdulillah”. Garmi mein woh khushk lakdiyon jaise hote the “Alhamdulillah” aur sardiyon mein un se khoon tapakta tha “Alhamdulillah” aur yeh us ka anjaam hua “Alhamdulillah”. Goya do satron mein chaar martaba lafz “Alhamdulillah” ka izafa kar diya gaya hai jab ke us ka asl se koi ta'alluq nahin hai. Ya ba'z maqaamaat par Janaab Zainab a.s. aur Umm-e-Kulsoom a.s. ke saath apne zaati zauq ki bina par lafz Khaanum ka izafa kar diya gaya hai “Zainab Khaanum” “Umm-e-Kulsoom Khaanum” taa ke un mukhaddaraat ki tajleel ho sake. Ya Hameed bin Qahtabah se kaatib ko nafrat thi to us ne us ko Hameed bin Qahtabah likh diya. Lekin yeh ehtiyaat ki ke Qahtabah ko bhi nuskha badal ke taur par likh diya ya Abdur Rabbih ko naa-munaasib samajh kar Umm-us-Salamah bana diya wagherah wagherah. In tamam mataalib ko naql karne se mera maqsad yeh tha ke ek taraf un tasarrufaat ki nishaan dehi kar di jinhein is shakhs ne apne saleeqa se naaqis ka kaamil aur kaamil ko naaqis bana diya hai aur yahin se yeh andaaza hota hai ke jin cheezon ko hum apni jehaalat wa naadaani ki bina par du'aon mein daakhil kar dete hain ya apne naaqis saleeqa ki bina par tasarrufaat kar dete hain aur us ko kamaal tasawwur karte hain yeh umoor us ke ahl-e-fan ke nazdeek sabab nuqsaan hain aur unheen ki wajah se du'a'ein aur ziyaarat ghair mo'tabar hoti hain lehaza munaasib yahi hai ke is baab mein kisi tarah ki mudakhlat na ki jaaye aur jis tarah Ma'soomeen a.s. ne farmaya hai waise hi amal kiya jaaye aur us se tajaawuz na kiya jaaye. Doosra sabab yeh bhi tha ke yeh bhi ma'loom ho jaaye ke jab ek mu'allif ki zindagi mein yeh kaam ho sakta hai to doosri kitaabon ka hashr kya hoga aur un kitaabon ka kya e'tibaar reh jaayega alaawa un chand mash'hoor wa ma'roof kitaabon ke jo mash'hoor ulamaa ki tasneeefaat mein hain aur ulamaa-e-fan ki nazron se guzar chuki hain aur unhon ne un par imzaa bhi kar diya hai jaisa ke siqa jaleel faqeeh buzurgwaar Younus bin Abdur Rahmaan ke haalaat mein likha gaya hai ke unhon ne rozanah ke a'maal mein ek kitaab likhi thi aur Janaab Abu Haashim Ja'fari ne is kitaab ko Imam Hasan Askari a.s. ke saamne pesh kiya to Hazrat ne poori kitaab ka mutaal'a karne ke baad farmaya ke "Yahi mera aur mere aabaa wa ajdaad ka deen hai aur yahi haq hai." Dekhiye Abu Haashim Ja'fari ne Younus bin Abdur Rahmaan ke kaamil ilm wa faqaahat wa diyanat ke jaanne ke bawajood apne zaati ilm par e'tibaar nahin kiya bal ke kitaab ko qaabil-e-amal banaane ke liye use Imam ki khidmat mein pesh kiya taa ke woh tasdeeq farma dein. Isi tarah Buraq Shanjani Hiraati se marwi hai jo intehaai mard-e-saadiq, saahib-e-salaah wa taqwa the ke woh Saamarra mein Imam Askari a.s. ki khidmat mein haazir hue aur Sheikh Jaleel-ul-Qadr Fazl bin Shaazaan Nishapuri ki kitaab Yawm wa Lailah ko Aan Hazrat ko diya aur kaha ke "Main Aap par qurbaan! Chahta hoon ke is par nazar saani farma lein aur waraq waraq mulaahiza farma lein." Hazrat ne farmaya ke "Yeh kitaab sahih hai. Is par amal ho sakta hai." Yeh haqeer agarche is zamaane ke logon ke zao'f ko jaanta hai aur use ma'loom hai ke woh is tarah ke masaa'il ko koi ahmiyat nahin dete hain. Phir bhi itmaam-e-hujjat ke liye be-panaah koshish ki ke du'a'ein aur ziyaaraat manqoolah ko is kitaab mein hatta-al-imkaan asli nuskhon se naql kiya jaaye aur phir muta'addid nuskhon se mila liya jaaye aur jahaan tak mumkin ho is ki tashih kar di jaaye taa ke is par amal karne waala ba-itminaan amal kar sake, bashartike baad ke kaatib aur naql karne waale un mein koi tasarruf na kar dein aur padhne waale apne saleeqa aur zauq ko shaamil na karein. Sheikh Kulayni ra ne Abdul Raheem Qaseer se naql kiya hai ke "Maine Imam Sadiq a.s. ki khidmat mein haazir ho kar arz kiya. Main Aap par qurbaan! Maine apne paas se ek du'a taiyaar ki hai." Farmaya "Apni ijaad ko apne paas rakho mujh se bayan na karo." Ya'ni Hazrat ne sunna bhi gawaara nahin kiya aur khud Aap ne ek dastoor-ul-amal bayan farmaya. Sheikh Sadooq ra ne Abdullah bin Sinaan se riwayat ki hai ke Imam Sadiq a.s. ne farmaya ke "Anqareeb tumhare paas woh shubhaat aane waale hain jin mein nishaan-e-manzil posheeda ho jaayega aur un shubhaat mein wahi shakhs nijaat paa sakega jo Du'a-e-Ghareeq ko padhega." Maine arz ki "Huzoor yeh Du'a-e-Ghareeq kya hai?" Farmaya.