Is din mein ghusl bhi mustahab hai aur is din ka roza tamaam gunaahon ki bakhshish ka waseela hai aur is din Namaz-e-Salmān bhi waarid hui hai.

Fazilat wa A'maal Maah-e-Sha'baan

Waazih rahe ke Maah-e-Sha'baan intehaai muhtaram maheenah hai jo mansoob hai Hazrat Sayyid-ul-Ambiyaa (S) ki taraf. Aap is maheenah mein musalsal roza rakhte the aur use Maah-e-Ramadaan se mila dete the aur farmate the ke "Yeh mera maheenah hai." Jo shakhs bhi is maheenah mein ek din bhi roza rakhega behisht us ke laazim hogi.

Imam Sadiq a.s. se riwayat hai ke jab Maah-e-Sha'baan aata tha to Imam Zainul Aabideen a.s. apne ashaab ko jama' kar ke farmate the "Yeh kaun sa maheenah hai?" Log arz karte "Maah-e-Sha'baan." To farmate ke "Yeh Maah-e-Sha'baan hai us ko Rasool-e-Akram (S) ne apna qaraar diya hai lehaza mohabbat-e-Paighambar (S) aur taqarrub-e-ilaahi ke liye is maheenah mein roze rakho. Qasam hai us Khuda ki jis ke qabza mein Ali bin al-Husain a.s. ki jaan hai ke maine apne padar-e-buzurgwaar Imam Husain a.s. se suna hai aur unhon ne farmaya ke maine Ameer-ul-Momineen a.s. se suna hai ke jo shakhs bhi mohabbat-e-Paighambar (S) aur taqarrub-e-ilaahi ke liye Maah-e-Sha'baan mein roza rakhega Khuda use apna mehboob aur muqarrab bana lega aur Roz-e-Qiyaamat karaamat ata farmaayega aur behisht us ke liye laazim qaraar de dega." Sheikh Tusi ra ne Safwaan Jammaal ke hawaala se bayan kiya hai ke mujh se Imam Sadiq a.s. ne farmaya ke "Apne atraaf ke logon ko Roza-e-Sha'baan par aamaada karo." Maine arz ki "Maula! Kya is roze mein koi fazeelat hai?" Farmaya "Yaqeenan. Rasool-e-Akram (S) jab Maah-e-Sha'baan ka chaand dekhte the to ek munaadi ke zariye elaam karaate the ke Main, ahl-e-Madeenah mein Rasool-e-Akram (S) ka naa'inda hoon. Āgāh ho jao ke Huzoor ne farmaya hai ke Maah-e-Sha'baan mera maheenah hai. Khuda rehmat kare us shakhs par jo is maheenah mein roza rakh kar meri imdaad kare."

Imam Sadiq a.s. ne farmaya ke "Ameer-ul-Momineen a.s. farmaya karte the ke jab se maine is munaadi ki aawaaz ko suna hai kabhi Maah-e-Sha'baan ka roza tark nahin kiya hai aur naa taa-hayaat tark karne waala hoon." Is ke baad farmate the ke Maah-e-Sha'baan wa Ramadaan ke roze tawbah aur maghfirat ka saamaan hain.

Isma'eel bin Abdul Khaaliq ne naql kiya hai ke main Imam Sadiq a.s. ki khidmat mein tha ke Maah-e-Sha'baan ke roze ka zikr aa gaya to Hazrat ne is silsila mein yahan tak farmaya ke agar koi shakhs khoon-e-naa-haq ka murtakib ho aur Maah-e-Sha'baan mein roza rakh kar Khuda ki baargaah mein istighfaar kare to roza use bhi faayda pahuncha sakta hai.

A'maal Mushtarika Maah-e-Sha'baan