A'maal-e-Shab Ekkees 21

Is raat ki fazeelat unneesween raat se zyada hai. Aur chahiye ke ghusl, shab bedaari, ziyarat, saat Qul Huwallāhu ki namaz, amal-e-Qur'ān, sau raka'at namaz, Dua al-Jawshan al-Kabir wagherah sab is raat mein baja le aaye. Aur riwaayaat mein is raat ke ghusl, shab bedaari aur sa'i-e-'ibaadat ki is raat aur te'eesween raat mein ta'keed ki gayi hai aur yeh Shab-e-Qadr inheen do raaton mein se koi ek raat hai. Ba'z riwaayaat mein hai ke Imam a.s. se sawaal kiya gaya ke in do raaton mein Shab-e-Qadr mu'ayyan farma dein to farmaya ke "Khuda se talab karne mein yeh do raatein is qadar aasaan hain" ya yeh ke farmaya: "Kya koi burā'ī hai agar amal-e-khair do raaton mein kar lo." Sheikh Sadooq ra ne farmaya ke mere mashā'ikh ne ek hi nishast mein yeh irshaad farmaya ke jo shakhs bhi in do raaton ko 'ilmī muzākaraat mein guzaar de yeh behtar amal hai.