Tangi-e-nafs aur khaansi door karne ka dastoor-ul-amal

21. Hadees meiñ hai ke Mufaddal ne Hazrat Imam Ja'far Sadiq 'alayhissalaam se saañs ki tangi ki shikaayat ki aur 'arz ki ke agar thoṛa bhi chalta hooñ to mera saañs phool jaata hai aur baiṭh jaata hooñ. Farmaaya ke ooñṭni ka peshaab piyo ṭheek ho jaaye ga.

Doosri hadees meiñ hai ek shakhs ne aap se khaansi ki shikaayat ki to aap ne farmaaya ke thoṛa sa Anjudan Roomi le kar itni hi miqdaar meiñ misri milaa kar us ka safoof tayyaar kar lo aur ek ya do din khaa lo. Us shakhs ka bayaan hai ke maiñ ne ek hi din khaaya tha ke marz bar-taraf ho gaya.