Fazilat-e-Masjid-e-Sahlah

Koofa ki Masjid Kabeer ke baad koi bhi Masjid fazeelat mein Masjid-e-Sahlah jaisi nahin hai jo Hazrat Idrees a.s., Hazrat Ibraheem a.s. ka makaan aur Hazrat Khizr a.s. ke wurood ki manzil aur un ka maskan thi. Imam Ja'far Sadiq a.s. se manqool hai ke Aap ne Abu Baseer se farmaya ke "Main yeh dekh raha hoon ke Hazrat Saahib-ul-Amr a.s. apne ahl wa ayaal ke saath Masjid-e-Sahlah mein waarid hue hain aur yahi Aap ki jagah hai aur Parwardigaar ne kisi bhi Paighambar a.s. ko nahin bheja hai magar us ne is Masjid mein namaz adaa ki hai. Lehaza jo shakhs is Masjid mein qiyaam kare goya us ne Khaima-e-Rasool (S) mein qiyaam kiya hai aur koi mard-e-momin ya zan-e-momina nahin hai jis ka dil is Masjid ki taraf maa'il na ho. Is Masjid mein ek patthar hai jis par Paighambar (S) ki tasveer naqsh hai aur jo shakhs bhi sachchi niyat ke saath is Masjid mein namaz aur du'a'ein karta hai us ki haajat be-har haal poori ho jaati hai aur agar amaan talab karta hai to amaan bhi mil jaati hai. Maine arz ki "Waaqi'an fazeelat wahi hai jo is Masjid ki hai." Farmaya ke "Kya aur zyada bayan karoon." Maine arz ki "Zaroor." Farmaya ke "Yeh un maqaamaat mein se hai jin ko Khuda dost rakhta hai ke wahaan us se du'a ki jaaye aur koi shab wa roz aisa nahin hai jab malaa'ika is Masjid ki ziyaarat aur is mein ibaadat ke liye na aate hon." Is ke baad farmaya ke "Agar mera ghar is Masjid se nazdeek hota to main tamaam namazein isi Masjid mein adaa karta." Aur farmaya ke "Is Masjid ke jo fazaa'il maine nahin bayan kiye woh is se kahin zyada hain jo bayan kar diye hain." Maine arz kiya "Hazrat Qaa'im Alaihissalam hamesha isi Masjid mein rahenge." Farmaya "Beshak."