(Farmaa'ish ki bina par is Du'a-e-'Adeelah ka parhna aur us kay ma'aani ko zehn mein rakhna waqt-e-maut kay inhiraf-e-haqq say bachnay kay liye behtareen faa'idah bakhsh hai al-battah yeh du'a ma'soomeen ('A.S.) ki hai ya kisi 'aalim nay usay murattab kiya hai. Is silsilay mein 'ilm-e-hadeeth kay maahir aur riwaayaat-o-irshaadaat-e-ma'soomeen ('A.S.) kay jam' karnay waalay 'aalim-e-khabeer aur saahib-e-baseerat muhaddith hamaaray ustaad Al-Haaj Mirza Husain Noori Rahmat ullah 'Alaih nay farmaya hai kay Du'a-e-'Adeelah ma'roofah Ja'far Ibn 'Ilm ki banaa'i hu'i hai aur nah kisi ma'soom ('A.S.) say naql hu'i hai aur nah haafizaan-e-ahaadeeth ki kitaabon mein us koi wujood paaya jaata hai. Al-battah waazeh rahay kay Shaikh Toosi (R.A.) nay Muhammad bin Sulaiman Dailami say yeh riwaayat ki hai kay mein nay Imam Ja'far Saadiq ('A.S.) say 'arz kiya kay aap kay shi'on mein yeh baat mash'hoor hai kay Imaan ki do qismein hain. Ek mustaqarr-o-saabit aur doosray zaa'il ho jaanay ka khatrah hai to aap mujhay koi aisi du'a ta'leem karain jis kay parhnay kay ba'd mera Imaan zaa'il nah honay paa'ay to aap nay farmaya kay har namaaz-e-waajib kay ba'd yeh du'a parho.)

Mein Khuda kay Rabb honay,

Hazrat Muhammad (S.A.W.W.) kay Nabi honay,

Islaam kay Deen honay,

Qur'aan kay Kitaab honay,

Ka'bay ka Qiblah honay,

aur Hazrat Ali ('A.S.) kay Wali-e-Imam

aur Hazrat Hasan ('A.S.)-o-Husain ('A.S.),

Ali bin Al-Husain ('A.S.), Muhammad ('A.S.) bin Ali ('A.S.),

Ja'far ('A.S.) bin Muhammad ('A.S.), Moosa ('A.S.) bin Ja'far ('A.S.),

Ali ('A.S.) bin Moosa ('A.S.), Muhammad bin Ali ('A.S.),

Ali ('A.S.) bin Muhammad ('A.S.), Hasan ('A.S.) bin Ali ('A.S.),

aur Hujjat bin Al-Hasan ('A.J.) kay Peshwaa

honay say raazi aur mutma'in hoon.

Khudaaya mein in ki Imaamat say raazi hoon to in ko

mujh say raazi kar day kay

tu har shay par qudrat aur ikhtiyaar rakhnay waala hai.