Ziyarat-e-Janaab Huzayfa Yamānī ra

2 Ziyarat Janaab Huzayfa a.s. Yamānī jo buzurgaan-e-ashaab-e-Rasool (S) aur khawaas-e-Ameer-ul-Momineen a.s. mein the aur un ki khusoosiyat yeh thi ke munaafiqeen ke naam jaante the aur agar kisi ki namaz-e-janaazah mein haazir nahin hote the to Khaleefa Dovum us ki namaz adaa nahin karte the. Kayi saal tak Mada'in mein waali rahe. Is ke baad unhein ma'zool kar diya gaya aur Salmān a.s. ko wahaan ka waali bana diya gaya. Jab Salmān ka inteqaal ho gaya to Huzayfa a.s. dobaarah waali banaaye gaye aur Ameer-ul-Momineen a.s. ke daur-e-khilaafat tak wahin rahe. Is ke baad Hazrat ne Madeenah se ahl-e-Mada'in ke liye farmaan bheja jis mein apni khilaafat aur Huzayfa a.s. ke wahaan waali rehne ki ittila' di. Lekin jab Hazrat Madeenah se ashaab-e-Jamal ke shar ko rafa' karne ke liye Basra ki taraf rawaana hue to abhi Koofa tak na pahunche the ke Huzayfa a.s. ka inteqaal ho gaya aur woh wahin Mada'in mein dafn ho gaye. Abū Hamza Sumaali ra se riwayat hai ke jab Huzayfa ka waqt-e-maut aaya to apne farzand ko bulaa kar chand naseehtein farmaayin ke un par amal karna. Farmaya "Dekho jo kuch logon ke haath mein hai us se maayoos ho jao ke us mein maaldaari aur be-niyaazi hai aur khabardaar logon se haajat talab na karna ke yeh khuli hui faqeeri hai aur hamesha aisi zindagi guzaaro ke aaj ka din kal se behtar ho aur jab bhi namaz padho use aakhri namaz samajh kar adaa karo aur kabhi aisa kaam na karo jis ki mu'aafi maangna pade."

Waazih rahe ke Janaab Salmān a.s. ke Haram ke pehloo mein ek Masjid Jāmi' hai jo Imam Hasan Askari a.s. ki taraf mansoob hai. Ya Hazrat ne use ta'meer karaya hai ya us mein namaz adaa ki hai lehaza kisi ko is Masjid mein Namaz-e-Tahiyyat se mahroom nahin rehna chahiye.