Satrah 17 Rabī'-ul-Awwal Roz-e-Wilaadat-e-Rasool-e-Khuda (S)

Roz Haftdahum

Ulamaa-e-Imāmiyyah ke darmiyaan mash'hoor hai ke yeh Roz-e-Wilaadat Bā-sa'ādat-e-Paighambar-e-Islam (S) hai. Aap ki Wilaadat Bā-sa'ādat Makkah Mu'azzamah mein Aap hi ke ghar mein hui hai Roz-e-Juma ṭulū'-e-fajr ke waqt 1 'Ām-ul-Fīl mein Nūshīrwān-e-'Ādil ki hukoomat ke zamaana mein. Neez isi roz 83 Hijri mein Imam Ja'far Sadiq a.s. ki Wilaadat Bā-sa'ādat hui hai jis ki wajah se is din ka faḍl wa sharaf aur bhi baṛh gaya hai aur yeh din intehaai sharaf waala hai. Is din mein chand a'māl hain:

1. Ghusl.

2. Roza. Jis ki fazeelat bahut hai aur riwayat mein hai ke jo shakhs is roz roza rakhe Khuda us ko ek saal ke roza ka sawaab ata karega aur yeh din un chaar dinon mein se hai jo saare saal mein roza ki fazeelat ke e'tebār se mumtāz hain.

3. Ziyarat-e-Hazrat Rasool-e-Khuda (S) nazdeek ya door se padhe

4. Ziyarat Imam Ameer-ul-Momineen a.s. Woh ziyarat jo Imam Sadiq a.s. ne Muhammad bin Muslim ko ta'leem di thi aur Ziyarat ke baab mein Insha'Allah zikr hogi.

5. Jab din buland ho jaaye to do raka'at namaz padhe. Har raka'at mein Surah al-Faatehah ke baad das martaba Surah al-Qadr aur das martaba Surah al-Tawheed padhe aur salaam ke ba'd muṣallā par baiṭhe baiṭhe yeh du'a padhe.

Yeh du'a bahut ṭūlānī hai aur us ki sanad bhi kisi Ma'soom tak pahunchi hai is liye ikhtisaar ki binā par tark kar diya gaya hai. Jo padhna chahe woh Zād-ul-Ma'ād ki taraf rujoo' kar sakta hai.

6. Musalmān is din ki ta'zeem karein, ṣadqa aur khairāt dein aur momino ko masrūr karein aur mashaahid-e-musharrafa ki ziyarat ko jaayen. Aur Sayyid ra ne Iqbāl mein is roz ki ta'zeem ki sharḥ bayan ki hai. "Maine Naṣārā ke giroh aur kuch Musalmānon ko dekha hai ke woh Roz-e-Wilaadat Janaab Isa a.s. ki ta'zeem karte hain to mujhe ta'ajjub hua ke kis tarah Musalmān muṭma'in ho gaye ke apne Paighambar (S) ki Wilaadat Bā-sa'ādat ke din ki ta'zeem Janaab Isa a.s. ki Wilaadat ke din se kam karein."