Sheikh Kulayni ra ki Ziyarat

Mu'allif: Behtar yeh hai ke Baghdad mein Sheikh Ajall 'Aali Maqaam Siqat-ul-Islam Muhammad bin Ya'qūb Kulayni ra ki ziyarat bhi kare ke apne daur mein Shi'on ke Sheikh aur Ra'ees aur Fann-e-Hadees ke mo'tamad tareen insaan the aur Aap ki kitaab Kāfi Shi'on ki aankhon ka noor hai jise Aap ne bees saal ki zehmat ke baad ta'leef kiya hai aur haq yeh hai ke mazhab wa jalaalat ki bina par Ibn-e-Atheer ne Aap ko teesri sadi Hijri ka Mujaddid-e-Shi'a qaraar diya hai jab ke is se pehle hamare Maula wa Aaqa Hazrat Imam Raza a.s. ko doosri sadi Hijri ka Mujaddid qaraar diya hai aur hum ne Kitaab Hadiyyah mein bahut se 'ulamaa-e-i'laam ka zikr kiya hai jo mashaahid-e-muqaddasah mein dafn kiye gaye hain. Jo shakhs khwaahishmand ho woh is kitaab ki taraf rujoo' kar sakta hai.