Fazilat Ziyarat Hazrat Ma'sūma a.s. Qum

Sayyidah Jaleelah Hazrat Fāṭimah Ma'sūma bint-e-Imam Musa bin Ja'far Alaihissalam jin ko Ma'sūma-e-Qum kaha jaata hai aur un ki qabr shareef sheher Qum mein ma'roof wa mash'hoor hai. Us mein qubba gumbad zareeh, sahn, khuddam aur bahut se mauqūfāt hain. Yeh ahl-e-'ilm ke liye roshni chashm aur aam insaanon ke liye panaah gaah hai har saal door daraaz ilaaqon se momineen ke kaarwān zehmat-e-safar bardaasht kar ke Aap ke fuyūz wa barakaat se mustafīd hote rehte hain.

Aap ki jalaalat ke baare mein Sheikh Sadooq ra ne sanad hasan misl sahih ke saath Sa'd bin Yassār se riwayat ki hai ke Imam Raza a.s. se Fatima bint-e-Musa a.s. bin Ja'far a.s. ke baare mein sawaal kiya gaya to farmaya ke "Jo un ki ziyarat kare us ke liye Jannat hai" aur doosri mo'tabar sanad se Imam Raza a.s. ke farzand Imam Muhammad Taqi a.s. se naql kiya gaya hai ke "Jo shakhs meri phophi ki Qum mein ziyarat kare us ke liye Jannat hai"