Ziyarat Imam Zāda Ḥamza a.s. Farzand Imam Musa Kāzim a.s.

Is ke baad muḥaqqiq mazkoor ne farmaya hai ke ba'z riwaayaat mein yeh hai ke Imam Zāda Hazrat 'Abdul 'Azīm Ray mein qiyām ke daurān apne ghar se khamoshī ke saath baahar niklte the aur us qabr ki ziyarat karte the jo Aap ki qabr ke saamne hai aur farmate the ke "Yeh Awlād-e-Musa Kāzim a.s. ki taraf mansoob hai" aur shaayad yahi woh qabr hai jis ki Hazrat 'Abdul 'Azīm ziyarat farmaya karte the lehaza un ki ziyarat bhi karni chahiye us ke liye is ziyarat ko padh sakte hain farq sirf yeh hai ke “as-salāmu 'alaika yā abā al-qāsim” ya us ke baad ke fiqraat ko nahin padhna chahiye. Waazih rahe ke Imam Zāda Ḥamza a.s. ke sahn mein Sheikh Jaleel Qudwat-ul-Mufassirīn Jamāl-ud-Dīn Abū al-Futūḥ Ḥusain bin 'Alī Khuzā'ī ṣāḥib-e-tafsīr mash'hūr ki qabr bhi hai lehaza un ki bhi ziyarat karni chahiye aur isi ilaaqa mein Janāb Sheikh Sadooq ra Ra'īs-ul-Muḥaddithīn ki qabr hai jo Ibn-e-Bābawayh ke naam se ma'roof hain aur un ki qabr Shāhzāda 'Abdul 'Azīm ke qareeb hai lehaza us se bhi ghaflat nahin karni chahiye.