A'maal-e-Shab-e-Māh-e-Rabī'-ul-Awwal 12 tā 17 Taarikh

Roz Dawāzdahum

Baarah 12 Rabī'-ul-Awwal

Ba-riwāyat Janāb Kulayni ra wa Mas'ūdī aur mutabiq mashhūr-e-'āmmah yahi hai ke Wilaadat Bā-sa'ādat Hazrat Rasool-e-Khuda (S) isi roz hui hai aur mustahab hai ke insaan do raka'at namaz padhe. Pehli raka'at mein Surah al-Faatehah aur teen baar Surah al-Kafirun (No. 109) padhe aur doosri raka'at mein Surah al-Faatehah aur teen martaba Surah al-Tawheed padhe. Is ke alaawa isi din Aan Hazrat (S) Madeenah mein waarid hue the aur Sheikh ne farmaya hai ke isi din 32 Hijri mein Banī Marwān ki hukoomat khatm hui hai.

Maah-e-Rabī'-ul-Awwal ki 14 Taarikh

Roz Chahārdahum

64 Hijri mein Yazīd bin Mu'āwiyah wāṣil-e-jahannam hua hai aur Akhbār-ud-Duwal mein hai ke Yazīd marz-e-dhāt-ul-janb mein maqaam Hawrān mein mara hai aur us ka janaaza Damascus laa kar Baab Ṣaghīr mein dafn kiya gaya hai aur us ki qabr ghoore par hai aur us ki 'umr 37 saal thi aur us ki hukoomat teen saal aur nau maheene rahi hai.

Satrahween Raat

Shab-e-Wilaadat Paighambar-e-Islam (S) hai aur bahut barkat waali raat hai aur Sayyid ra ne farmaya hai ke is raat mein hijrat se ek saal qabl Aan Hazrat (S) ki me'rāj hui thi.