Mu'allif-e-kitaab Shaykh Abbas Qummi rahmatullahi 'alayhi farmaate hain ke bahut saari aayatoñ wa riwaayatoñ se ma'loom hota hai ke Musalmaanoñ ko kuffaar ki dosti, un se mail mohabbat aur ziyaadah rawaabiṭ se parhez karna chaahiye aur un se mushaabihat ikhtiyaar na karna chaahiye aur na un ke rasm-o-riwaaj ko apnaana chaahiye.
Zaroor tumhaare liye Ibraaheem (A.S.) aur unke saathiyon ke kirdaar mein behtareen namoonah-e-amal hai jab unhon ne apni qaum se kaha ke hum tum logon se bari hain aur Khuda ke ilaawa jin ki tum ibaadat karte ho aur hamaare tumhaare darmiyaan hamesha ki adaawat aur dushmani zaahir ho chuki hai.
Shaykh Sadooq rahmatullahi 'alayhi ne Hazrat Imam Sadiq 'alayhissalaam se riwaayat ki hai ke Khuda-e-'Alam ne ek Paighambar ki taraf yeh waḥi farmaa'i ke Mo'mineen se keh do ke mere dushmanoñ ka libaas pehanna, na hi un ke yahaañ khaana khaana aur na un ke raaste aur rasm-o-riwaaj ko ikhtiyaar karna warna tum bhi isi tarah mere dushman ho jaa'o ge jis tarah woh mere dushman hain.
Isi liye bahut si riwaayatoñ meiñ hai ke fulaañ 'amal ko anjaam do aur kuffaar ki mushaabihat ikhtiyaar na karo.
