Imam Moosa Kazim Ka Sajdah Shukr

Aur mustahab yeh hai ke is Sajdah ko tool de jaisa ke manqool hai ke Hazrat Imam Moosa Kazim (A.S.) Tulu'-e-Aaftaab ke ba'd se Zawaal-e-Aaftaab tak aur Asr ke ba'd shaam tak Sajdah mein raha karte the.

Aur doosri hadees mein hai ke Hazrat das saal se zyada har roz Tulu'-e-Aaftaab se Zawaal tak Sajdah mein rahe the.

Aur saheeh sanad ke saath manqool hai ke Imam Raza (A.S.) itni der tak Sajdah mein rehte the ke sangreze Aap (A.S.) ke paseena se tar ho jaate the aur Aap (A.S.) chehre ke daayen aur baayen dono hisson ko zameen se mila dete the.

Rijaal Kashi mein hai ke Fazl bin Shaazaan ne Ibn Abi Umair ke paas aaye jab ke woh Sajdah mein the aur unhon ne Sajdah ko bahut tool diya. Jab sar uthaaya to logon ne unke Sajde ke toolani hone ka zikr kiya to kaha ke agar tum Jameel bin Darraaj ke Sajde dekh lete to mere Sajde ko kabhi toolani na kehte.

Phir main ek din Jameel bin Darraaj ke paas gaya to unhon ne bahut der tak Sajdah kiya. Jab sar uthaaya to maine kaha tumne bahut der tak Sajdah kiya hai.

Kaha ke agar tum Ma'roof bin Kharbooz ke Sajde ko dekh lete to mere Sajde ko bahut aasaan samajhte.

Aur Fazl bin Shaazaan hi ne riwaayat ki hai ke Ali bin Fazzaal Ibaadat ke liye Sehra mein chale jaate the aur itna toolani Sajdah karte the ke parinde zameen par pada hua kapda samajh kar unki pusht par baith jaate the aur unke gird jaanwar ghaas khaate rehte the aur unse bilkul nahi darte the.

Aur yeh riwaayat bhi hai ke jab sooraj Tulu' hota tha to Ali bin Mahziyaar Sajdah mein jaate the aur us waqt tak sar na uthaate the jab tak apne ek hazaar bhaiyon ke liye bilkul isi tarah du'a na kar lein jis tarah apne liye du'a ki hai aur taweel Sajdon ki bina par unki peshaani par aisa ghattah tha jaise oont ke pairon par ghattay hote hain.

Aur yeh bhi riwaayat hai ke Ibn Abi Umair Namaaz-e-Subh ke ba'd Sajdah-e-Shukr mein ja kar Zohar tak sar nahi uthaate the.

Aur afzal yeh hai ke Sajdah-e-Shukr ko tamaam Ta'qibaat ke ba'd aur nawaafil se pehle anjaam de aur Namaaz-e-Maghrib ke liye aksar ulamaa ne kaha hai ke nawaafil ke ba'd Sajdah-e-Shukr adaa kare.

Aur ba'z nawaafil se pehle bhi kaha jaata hai aur zaahiran dono hi behtar hain aur nawaafil se pehle bajaa laana zyada behtar hai jaisa ke Himyari (R.A.) ne Imam-e-Zamaana Alaihis Salaam se riwaayat ki hai aur agar dono tareeqe se bajaa laaye to shaayad aur behtar hoga.