Hikaayat Sayyid Rashtī

Hamare ustaad ne Najm-us-Saaqib mein ek hikaayat naql ki hai jis se ma'loom hota hai ke is ziyarat ki paabandi zaroori hai aur us se ghaflat nahin honi chahiye. Hikaayat yeh hai ke Janaab Muhtaram Mard-e-Muttaqi-e-Naik Kirdaar Sayyid Ahmad bin Sayyid Haashim bin Sayyid Hasan Moosavi Rashtī jo taajir the aur sattrah saal qabl Najaf Ashraf mein musharraf hue. Aalim-e-Rabbānī-e-Buzurgwār Janaab Sheikh Ali Rashtī taba surāhu jin ka zikr aaindah hone waala hai Mu'allif! Is ziyarat ko Sheikh ra ne Tahdhīb mein naql kiya hai aur us ke baad ek Du'a-e-Wida' naql ki hai jis ko ikhtisaar ki bina par hum ne tark kar diya hai. Yeh ziyarat ba-qaul Allama Majlisi ra ba-e'tibaar-e-'ibaarat wa sanad wa fasaahat wa balaaghat behtareen ziyarat ahsan wa akmal ziyarat hai aur main jab tak 'atabaat-e-'aaliyaat mein raha Aimma ki yahi ziyarat padhta raha. Hamare ustaad ne Najm-us-Saaqib mein ek hikaayat naql ki hai jis se ma'loom hota hai ke is ziyarat ki paabandi zaroori hai aur us se ghaflat nahin honi chahiye. Hikaayat yeh hai ke Janaab Muhtaram Mard-e-Muttaqi-e-Naik Kirdaar Sayyid Ahmad bin Sayyid Haashim bin Sayyid Hasan Moosavi Rashtī jo taajir the aur sattrah saal qabl Najaf Ashraf mein musharraf hue. Aalim-e-Rabbānī-e-Buzurgwār Janaab Sheikh Ali Rashtī taba surāhu jin ka zikr aaindah hone waala hai, ke saath haqeer ke ghareeb khaana par tashreef le aaye aur jaate waqt Sheikh ne Sayyid Muhtaram ke husn-e-kirdaar aur un ki neki ke baare mein ishaara kiya aur farmaya ke "Un ka ek ajeeb qissa hai." Lekin chunke us waqt bayan ka imkaan nahin tha lehaza chand dinon ke baad jab mulaqaat hui to unhon ne farmaya "Woh Sayyid chale gaye" aur us ke baad qissa ko tafseel ke saath bayan kiya aur mujhe be-had afsos hua ke maine is qissa ko khud un se kyun na suna agarche Sheikh marhoom ki shaan us se buland tar hai ke woh naql karne mein kisi tarah ki khiyanat karein. Us waqt se chand maah pehle tak yeh matlab mere dil mein raha yahan tak ke is saal ke Maah-e-Jamādi-us-Saaniyyah mein jab Najaf Ashraf se waapas hua to Kaazimein mein maine un Sayyid buzurg se mulaqaat ki jo Saamarra se waapas aaye the aur 'Ajam ki taraf jaa rahe the aur jo haalaat main ne sune the un ke baare mein daryaaft kiya. Unhon ne qissa ko is tareeqa se naql kiya ke 1280 Hijri mein Hajj-e-Baitullah ke iraada se Rasht se Tabrez aaya aur Haaji Safar Ali Taajir Tabrezi ke ghar mein qiyaam kiya. Chunke koi qaafila nahin tha lehaza main pareshaan tha yahan tak ke Haaji Jabbaar Jallāwdār Isfahānī ne saamaan uthaaya aur Trabūzun ki taraf chalne lage maine bhi un ke saath sawaari kiraaya par li aur chal pada. Pehli manzil par pahuncha to teen aadmi aur Haaji Safar Ali ke aamaada karne par mere saath ho gaye. Ek aadmi Mulla Baaqir Tabrezi jo ulamaa ke darmiyaan mash'hoor the aur ek Sayyid Husain Taajir Tabrezi aur ek Haaji Ali naam ke khidmatguzaar the. Hum sab saath rawaana hue yahan tak ke manzil-e-Arzanat-ur-Rūm pahunche aur wahaan se iraada Trabūzun ka tha ke ek manzil par in donon shehron ke darmiyaan Haaji Jabbaar Jallāwdār mere paas aaye aur kaha "Yeh manzil jo is ke baad hai woh qadre khatarnaak hai lehaza saamaan fauran laa deejiye taa ke qaafila ke saath chalein" kyunki aam taur se hum log qaafila se alag alag rehte the. Hum ne bhi taqreeban dhaai ya teen ghanta subh se pehle qaafila ke saath harkat kar di. Aadha ya teen chauthā'i farsakh apni jagah se door hue the ke fiza taareek ho gayi aur barf baari shuru ho gayi. Tamaam rufaqaa ne apne sir ko dhaank liya aur mujh se tez tar chalne lage. Main bhi unheen ke saath chal pada jo mere liye mumkin nahin tha yahan tak ke woh sab nikal gaye aur main tanhaa reh gaya to ghode se utar kar main raasta ke kinaara baith gaya aur intehaai pareshaan tha ke mere saath taqreeban chheh sau 600 tomaan bhi the. Kaafi ghaur wa fikr ke baad maine yeh tay kiya ke isi maqaam par subh tak rahenge aur jis manzil se aayen hain waapas ho jaayenge aur wahaan se chand afraad ko saath le kar qaafila se mulhiq ho jaayenge. Us waqt maine apne ko ek baagh ke saamne dekha ke us baagh mein ek baaghbaan tha jo haath mein belcha liye hue tha aur darakhton par maar kar barf ko giraa raha tha woh mere qareeb aaya aur kaha ke "Tum kaun ho." Maine kaha ke "Mere saathi chale gaye main akela reh gaya hoon aur raasta nahin ma'loom hai." Unhon ne Farsi mein farmaya ke "Naafila-e-Shab padho taa ke raasta mil jaaye." Main mashghool-e-naafila ho gaya. Jab us se faarigh hua to unhon ne farmaya ke "Tum abhi tak gaye nahin." Maine kaha "Mujhe raasta nahin ma'loom hai." Farmaya "Jāmi'ah padho" mujhe Jāmi'ah yaad nahin tha aur abhi tak yaad nahin hai haalaanke mukarrar Ziyarat-e-'Atabaat-e-'Aaliyaat se musharraf hua hoon. Woh apni jagah se uthe aur tamaam Jāmi'ah ko awwal se aakhir tak haafiza se padha aur phir farmaya ke "Tum abhi tak nahin gaye" mujhe be-ikhtiyaar rona aa gaya. Maine kaha "Main raasta nahin jaanta." Farmaya "Ziyarat-e-Aashoora padho." Mujhe Ziyarat-e-Aashoora bhi yaad nahin thi aur abhi tak yaad nahin hai. Lekin main utha aur mashghool-e-Ziyarat-e-Aashoora ho gaya. Yahan tak ke tamaam salaam, la'n aur Du'a-e-'Alqamah padh liya. Phir maine dekha ke woh aaye aur farmaya ke "Abhi tak nahin gaye?" Maine kaha ke "Ab main subh tak rahunga." Farmaya ke "Main tumhein abhi qaafila tak pahunchaaye deta hoon." Yeh keh kar khachar par sawaar hue aur belcha ko kaandhe par rakha aur farmaya ke "Mere saath tum bhi sawaar ho jao." Main sawaar hua. Us ki lagaam ko kheenchā woh na chala to farmaya ke "Lao lagaam tum mujhe de do." Maine de di. Unhon ne belcha ko baayein kaandhe par rakha aur apne daahne haath se us ki lagaam ko kheenchā, woh chal pada aur nihaayat sukoon ke saath chalne laga. Unhon ne apne haath ko mere zaanoon par rakha aur farmaya ke "Tum Naafila-e-Shab kyun nahin padhte ho? Naafila padho, Naafila padho, Naafila." Phir farmaya "Aashoora kyun nahin padhte ho? Aashoora padho. Aashoora. Aashoora." Us ke baad farmaya ke "Jāmi'ah kyun nahin padhte ho? Jāmi'ah padho. Jāmi'ah. Jāmi'ah." Aur musaafat tai karte waqt bhi woh daa'ira ki shakl mein chal rahe the ke ek martaba mude aur farmaya ke "Yeh hain tumhare rufaqaa jo ek nehr ke kinaare thehre hue hain aur Namaz-e-Subh ke liye wuzu mein mashghool hain." Main us khachar se utra aur apne ghode par sawaar hone laga to woh qaabū mein na aaya. Jis ke baad woh khud paidal ho gaye aur unhon ne apne belcha ko barf mein gaadh diya aur mujhe sawaar kiya aur ghode ke sir ko rufaqaa ki taraf mod diya. Mujhe us waqt yeh khayaal aaya ke "Yeh shakhs kaun tha? Jo Farsi bol raha tha haalaanke is ilaaqa mein Turki ke alaawa koi zabaan aur Esaa'i ke alaawa koi mazhab nahin hai, phir is tezi se unhon ne rufaqaa tak kaise pahuncha diya." Maine jab mud ke dekha to koi nazar na aaya aur kahin door door aasaar nahin dikhaai diye aur main apne rufaqaa se mulhiq ho gaya.