Aadaab-e-Zaa'ir Sayyid-ush-Shuhada

Woh Aadaab jin ki ri'aayat Zaa'ir-e-Sayyid-ush-Shuhada ke liye zaroori hai. Raah-e-Ziyarat mein ya Haram-e-Mutahhar mein.

1. Ghar se nikalne se pehle teen din roza rakhe aur teesre din ghusl kare jaisa ke Imam Sadiq a.s. ne Safwaan ko bataya tha aur is ka zikr Ziyarat Haftum mein aane wala hai.

Sheikh Muhammad bin Mashhadi ne Ziyarat Eidain mein zikr farmaya hai ke jab Imam Husain a.s. ki ziyarat ka iraada karo to teen din roza rakho aur teesre din ghusl karo aur ahl wa ayaal ko jama' kar ke kaho.

Is ke baad intehaai khuzoo wa khushoo ke saath ghar se bar aamad ho. Aur yeh kehta rahe.

Maalik ki sana kare aur Muhammad (S) wa Aal-e-Muhammad (S) par salawaat bheje aur is ke baad sukoon wa waqaar ke saath chale. Riwayat mein hai ke Parwardigaar Zaa'ireen-e-Qabr-e-Husain a.s. ke paseena ke har qatre se sattar hazaar farishton ko khalq farmaata hai jo Malk ki tasbeeh karte hain aur Zaa'ir ke liye istighfaar karte hain aur Roz-e-Qiyaamat tak yeh silsila jaari rahega.

2. Imam Ja'far Sadiq a.s. se manqool hai ke jab Ziyarat-e-Imam Husain a.s. ke liye jao to Aan Hazrat ki ziyarat mahzoon, ghamnaak aur ghubaar aalood wa tishna wa gursana haalat mein karo ke Aap ko isi kaifiyat mein shaheed kiya gaya hai. Apni haajat ko talab karo aur fauran waapas aa jao aur is jagah ko apna watan na banao.

3. Safar-e-Ziyarat mein koi lazeez cheez Beryani, Halwa waghera saath na le jao aur apni khuraak ko mamooli qaraar do ke Imam Sadiq a.s. se riwayat hai ke Hazrat ne farmaya ke "Maine suna hai ke ek jama'at Ziyarat-e-Imam Husain a.s. ke liye jaati hai aur apne saath dastarkhwaan, bhune hue gosht aur halwa ke saath jaati hai. Kya yeh log agar apne maa baap ya doston ki qabr par jaate hain to isi tarah ka saamaan le kar jaate hain." Doosri mo'tabar hadees mein hai ke Aan Hazrat ne Mufazzal bin Umar se farmaya ke "Ba'z auqaat Imam Husain a.s. ki ziyarat karna na karne se behtar hai aur ba'z auqaat ziyarat na karna ziyarat karne se behtar hota hai." Mufazzal ne arz ki ke "Huzoor Aap ne to meri kamar tod di." Farmaya ke "Wallah agar tum apne maa baap ki qabr ki ziyarat ko jaate ho to ghamgeen aur ranjeeda ho kar jaate ho aur jab Imam Husain a.s. ki ziyarat ko jaate ho to apne saath dastarkhwaan aur saamaan le kar jaate ho, yeh ghalat hai. Tumhein chahiye ke gard aalood aur pareshaan haal ban kar jao."

Mu'allif ka kehna hai ke kis qadar munaasib hai ke aghniyaa aur tujjaar apne safar mein is baat ka lihaaz rakhein aur apne shehr se le kar Karbala-e-Mu'allaa tak agar raasta mein log unhein da'wat aur mehmaani ke liye mad'oo karein to aisi da'waton ko qabool na karein jin mein behtareen ghizaa'ein aur murgh wa beryani waghera paai jaati hon aur apne ghar se bhi achchi ghiza'ein le kar na niklein aur yeh kahein ke "Hum musaafir-e-Karbala hain, hamare liye aisi ghiza'ein munaasib nahin hain."

Sheikh Kulayni ra ne yeh riwayat naql ki hai ke Shahaadat-e-Imam Husain a.s. ke baad Aap ki zauja-e-Kalbiyah ne saff-e-azaa bichhaai aur Aap par girya kiya aur tamaam aurton aur khaadimon ne is qadar girya kiya ke aansoo khushk ho gaye to kisi jagah is Mu'azzamah ke liye qataa ka murgh bheja gaya taa ke us se girya ki taaqat paida ho to un Mu'azzamah ne dekhte hi poochha ke "Yeh kya hai?" Logon ne kaha ke "Fulaan shakhs ne Aap ke liye hadiya bheja hai is ke zariye maatam-e-Husain a.s. ki quwat paida ho." Farmaya "Hum kisi shaadi mein nahin hain lehaza hamara aisi khuraak se kya ta'alluq hai?" Is ke baad Aap ne yeh ghiza ko ghar se baahar bhijwa diya.

4. Un cheezon mein jo Safar-e-Ziyarat Imam Husain a.s. mein mustahab hain yeh hai ke tawaazu, inkisaar, farotani aur khuzoo wa khushoo ke saath is tarah chale jis tarah koi bandah-e-zaleel raasta tai karta hai. Woh log jo raah-e-ziyarat mein nai nai jadeed sawaariyon par sawaar hote hain unhein in baaton ki taraf khusoosiyat ke saath mutawajjeh rehna chahiye ke kahin se takabbur aur ghuroor na paida hone paaye aur baaqi zaa'ireen jo sakhti aur mushaqqat ke saath safar karte hain un ke saamne buzurgi ka izhaar na ho aur unhein haqaarat ki nazar se na dekha jaaye. Ulama-e-Kiraam ne Ashaab-e-Kahf ke haalaat mein naql kiya hai ke yeh log Diqiyaanoos ke makhsooseen bal ke wuzaraa mein the lekin jab Parwardigaar-e-Aalam ne apni rehmat ko un ke shaamil-e-haal kiya to Khuda parasti aur islaah-e-amal ki taraf mutawajjeh ho gaye aur tamaam logon se kinaarah kash ho gaye aur ghaar mein panaah le kar ibaadat-e-ilaahi mein mashghool ho gaye. Yeh ghodo par sawaar ho kar shehr se baahar nikle. Abhi teen meel raasta tai kiya tha ke un mein se Talmeekha ne kaha ke "Logo ko aakhirat ki miskeeni ke din aa gaye hain aur mulk-e-dunya hamare haath se nikal gaya lehaza ab ghodo se utar aao aur paidal chalo taa ke Parwardigaar hamare haal par reham kare aur hamein sukoon wa itminaan inayat farmaaye" chunanche sab ke sab ghodo se utar aaye aur saat farsakh ka raasta paidal tai kiya yahan tak ke pair zakhmi ho gaye aur pairon se khoon behne laga. Zaa'ireen-e-Qabr-e-Mutahhar Imam Husain a.s. ko is matlab ko nigaah mein rakhna chahiye aur yeh jaanna chahiye ke is raaste mein jis qadar bhi tawaazu se kaam liya jaaye bulandi-e-darajaat ka ba'is hoga.

Aadaab-e-Ziyarat-e-Imam Husain a.s. mein Imam Ja'far Sadiq a.s. se yeh bhi naql kiya gaya hai ke jo shakhs Ziyarat-e-Imam Husain a.s. ke liye paidal safar karega Parwardigaar us ke liye har qadam par hazaar nekiyaan likhega aur hazaar gunaah mahv kar ke behisht mein hazaar darajaat ata karega. Lehaza Shatt-e-Furaat par pahunchne ke baad ghusl karo aur paa barehna (barefoot) ho kar na'lain ko haath mein le kar raasta tai karo jaise koi bandah-e-zaleel raasta tai karta hai.

5. Agar raah-e-ziyarat mein kisi zaa'ir ko khasta haalat dekhe aur woh madad talab kare to jahan tak mumkin ho us par tawajjeh de aur use manzil tak pahuncha de. Aisa na ho ke us ki taraf se be-e'tinaai amal mein aaye. Sheikh Kulayni ra ne mo'tabar sanad ke saath Abu Haaron se riwayat ki hai ke "Main Imam Sadiq a.s. ki khidmat mein tha ke Aap ne apne paas ke ashaab se farmaya ke 'Aakhir tumhein kya ho gaya hai ke tum hamein haqeer samajhte ho?'" Yeh sunna tha ke un ke darmiyaan se ek shakhs Khuraasaani khada ho gaya kehne laga. "Khuda ki panaah hum aur Aap ko haqeer aur ma'moooli khayaal karenge?" Farmaya ke "Jo log ham ko ma'moooli samajhte hain un mein se ek tum bhi ho." Us ne kaha ke "Panaah ba-Khuda main aisa kar sakta hoon?" Farmaya ke "Waa'e tumhare haal par. Kya tum ne us shakhs ki aawaaz nahin suni thi jo Hajfa ke nazdeek yeh keh raha tha ke 'Hamein ek meel ke liye apne saath sawaar kar lo. Main khasta haal ho gaya hoon' aur tum ne mud kar bhi nahin dekha tha aur use haqeer samajh liya tha. Yaad rakho ke jis ne kisi momin ko zaleel kiya us ne ham ko zaleel kiya hai aur hamari hurmat ko zaa'i' kiya hai."

Mu'allif ka bayan hai ke hum ne Aadaab-e-Ziyarat mein Adab Nahum ke zail mein ek bayan Ali bin Yaqteen ki riwayat ke saath naql kiya hai jo is maqaam ke liye munaasib hai lehaza use bhi dekha jaa sakta hai aur woh behtareen mau'izah hai. Aur yahaan is maqaam par jis adab ka zikr kiya gaya hai us ka ta'alluq sirf Ziyarat-e-Imam Husain a.s. se nahin hai lekin chunke raah-e-ziyarat ka waaqi'a tha is liye hum ne is maqaam par naql kar diya.

6. Siqa Jaleel-ul-Qadr Muhammad bin Muslim ra se riwayat hai ke Imam Baqir a.s. se arz kiya gaya ke "Hum jab Aap ke padar-e-buzurgwaar Imam Husain a.s. ki ziyarat ke liye jaate hain to kya aisa nahin hai jaise Hajj mein hon?" Farmaya "Beshak." Arz kiya "To kya hum par woh sab kuch laazim hai jo haajiyon par laazim hai." Farmaya ke "Beshak tumhara farz hai ke rufaqaa ke saath behtareen sulook karo. Kam guftagu karo. Baatein behtareen karo aur Khuda ko zyada yaad karo. Paakeezah libaas pehno aur Haram mein daakhil hone se pehle ghusl karo aur yeh bhi laazim hai ke khuzu wa khushoo aur riqqat-e-qalb ke saath badho aur wahaan jaa kar namazein adaa karo. Muhammad (S) wa Aal-e-Muhammad (S) par musalsal salawaat padhte raho apne ko un cheezon se mahfooz rakho jo tumhare liye munaasib nahin hain. Apni nigaahon ko haraam aur mushtabah cheezon se neeche rakho aur Baradaraan-e-Moomineen ke saath ehsaan karo aur agar dekho ke kisi ka maal khatm ho gaya hai to us ki madad karo aur apne kharch ko un ke darmiyaan taqseem kar do. Yeh bhi zaroori hai ke taqiyyah ka lihaaz rakho ke deen ka qiyaam taqiyyah se hai aur un cheezon se parhez karo jin se Khuda ne mana kiya hai. Logon se jhagda na karo. Zyada qasam na khao. Logon se behas na karo. Agar tum ne aisa kar liya to tumhein Hajj wa Umrah ka sawaab mil jaayega aur tum Maalik ki taraf us ajr ke haqqdaar ho jaoge jo us shakhs ko milta hai jo maal kharch kar ke apne mahall se door jaa kar Parwardigaar se guzaarish karta hai. Waapsi ke waqt tumhare gunaah bakhsh diye jaayenge aur tum rehmat ke haqqdaar ho jaoge."

7. Abu Hamza ne Imam Sadiq a.s. se Baab-e-Ziyarat mein naql kiya hai ke jab Nainawa pahuncho to apna saamaan utaar do aur apne jism par tel ki maalish na karna, surma na lagaana aur jab tak wahaan rehna khabardaar gosht iste'maal na karna.

8. Aab-e-Furaat se ghusl kare ke is baare mein muta'addid riwaayaat waarid hui hain aur ek hadees mein Imam Sadiq a.s. se manqool hai ke jo shakhs bhi Aab-e-Furaat se ghusl kar ke Imam Husain a.s. ki ziyarat karega woh gunaahon se is tarah paak ho jaayega jaise shikam-e-maadar se paida hua hai chaahe us ke gunaah kabeera hi kyun na hon.

Riwayat mein hai ke Aan Hazrat se kaha gaya ke "Aksar aisa hota hai ke hum Ziyarat-e-Qabr-e-Imam Husain a.s. ke liye jaate hain aur hamare liye sardi waghera ki bina par ghusl mushkil ho jaata hai." Farmaya ke "Jo shakhs Furaat mein ghusl kare aur Imam Husain a.s. ki ziyarat kare Parwardigaar-e-Aalam us ke waaste woh fazeelat ata karta hai jis ka shumaar na ho sake."

Basheer-e-Dahhaan se riwayat hai ke Hazrat Sadiq a.s. ne farmaya ke "Jo shakhs bhi Ziyarat-e-Imam Husain a.s. ke liye jaaye. Wuzu kare. Furaat mein ghusl kare. To jo qadam bhi uthaayega ya ya rakhega Parwardigaar us ke liye Hajj wa Umrah ka sawaab likh dega." Ba'z riwaayaat mein yeh hai ke Furaat mein bhi us jagah ghusl kare jo qabr ke saamne hai aur ba'z riwaayaat se ma'loom hota hai ke jab Furaat ke nazdeek pahunche to sau martaba Allahu Akbar, sau martaba Laa ilaaha illallaah kahe

aur sau martaba Salawaat padhe.

9. Jab Haram mein daakhil hona chahe to Mashriqi Darwaaza se daakhil ho jaisa Imam Sadiq a.s. ne Yousuf Kinaasi se farmaya tha.

10. Ibn-e-Qaulawayh ki riwayat hai ke Imam Sadiq a.s. ne Mufazzal ra bin Umar se farmaya ke "Jab Qabr-e-Imam Husain a.s. ke paas pahuncho to Rauza ke darwaaza par thehar kar yeh kalimaat padho ke har kalima ke iwaz rehmat-e-ilaahi ke haqqdaar ban jaaoge."

Is ke baad qabr ki taraf aage badhe ke jo qadam bhi uthaayega ya rakhega use woh sawaab milega jaise koi raah-e-Khuda mein apne khoon mein dooba hua ho. Qabr ke paas pahunch kar apne haathon ko qabr par rakh kar kahe

Is ke baad namaz ki taraf mutawajjeh ho jaaye ke jo raka'at bhi yahaan adaa ki jaayegi us ka sawaab us shakhs ka hoga jis ne hazaar ghulaam azaad kiye hon aur hazaar martaba raah-e-Khuda mein kisi Paighambar Mursal (S) ke saath jihaad kiya ho.

11. Abu Sa'eed Madaini se manqool hai ke "Imam Sadiq a.s. ki khidmat mein haazir hua aur maine kaha main Ziyarat-e-Imam Husain a.s. ke liye jaa raha hoon." Farmaya "Jao Ziyarat-e-Farzand-e-Rasool (S) Imam Husain a.s. ke liye jo tamaam nek kirdaaron mein nek kirdaar the, magar jab Aan Hazrat ki ziyarat karo to baala-e-sar hazaar martaba Tasbeeh-e-Ameer-ul-Momineen a.s. padho aur paa'een paa hazaar martaba Tasbeeh-e-Fatimah padho. Is ke baad do raka'at namaz adaa karo. Pehli raka'at mein Surah Yaaseen padho aur doosri raka'at mein Surah Rahmaan padho. Agar aisa karoge to tumhare waaste sawaab-e-kaseer hoga." Maine arz kiya ke "Main Aap par qurbaan. Yeh Tasbeeh-e-Ali a.s. wa Fatima a.s. kya hai." Farmaya. "Aye Abu Sa'eed Tasbeeh-e-Ali a.s. yeh hai

aur Tasbeeh-e-Janaab-e-Fatimah (S) yeh hai.

12. Qabr-e-Imam Husain a.s. ke paas namaz-e-waajib wa mustahab adaa kare ke wahaan namaz maqbool hoti hai. Sayyid bin Ta'us ra ne farmaya hai ke koshish karo ke tum se Haram Mubaarak mein koi waajib fareeza ya naafila tark na hone paaye ke riwayat mein hai ke Aan Hazrat (S) ke paas Namaz-e-Waajib Hajj ke baraabar hai aur Namaz-e-Naafila Umrah ke baraabar hai. Mu'allif ka bayan hai ke riwayat-e-Mufazzal mein Haa'ir Mubaarak mein namaz ki fazeelat ka zikr ho chuka hai aur doosri mo'tabar riwayat mein Imam Sadiq a.s. se manqool hai ke jo shakhs Aan Hazrat ki ziyarat kare aur do raka'at ya chaar raka'at namaz wahaan adaa kare use Parwardigaar Hajj wa Umrah ka sawaab dega. Riwaayaat se zaahir hota hai ke Namaz-e-Ziyarat ya doosri namazein qabr ke peechhe ya baala-e-sar donon jagah padhi jaa sakti hain. Agar baala-e-sar padhe to is qadar peechhe reh kar padhe ke asl qabr ke muqaabila mein na ho.

Abu Hamza Sumaali ra Imam Sadiq a.s. se riwayat karte hain ke "Aan Hazrat ke baala-e-sar do raka'at namaz adaa karo. Pehli raka'at mein Surah Hamd wa Yaaseen aur doosri raka'at mein Surah Hamd wa Rahmaan padho aur agar chaaho to pusht-e-qabr par bhi namaz ho sakti hai lekin baala-e-sar behtar hai. Is namaz se faarigh hone ke baad jo namaz chaaho padh sakte ho lekin yeh do raka'at Namaz-e-Ziyarat be-har haal padhna hai har us maqaam par jahaan ki ziyarat karo. Ibn-e-Qaulawayh ra ne Imam Baqir a.s. se riwayat ki hai ke Aap ne ek shakhs se farmaya ke "Tumhare liye kya maani' hai ke jab koi zaroorat pesh aaye to jao Qabr-e-Husain a.s. ke paas aur chaar raka'at namaz padh kar apni haajat talab karo ke wahaan namaz fareeza Hajj ke baraabar hai aur Namaz-e-Naafila Umrah ke baraabar hai."

13. Rauza-e-Mutahhar Imam Husain a.s. mein behtareen amal Du'a hai ke is jagah ya'ni Zair-e-Qubbah Imam Husain a.s. du'a'ein maqbool hoti hain aur yeh un cheezon mein se hai jis ko Imam Husain a.s. ko Parwardigaar ne Shahaadat ke iwaz mein ata farmaya hai. Zaa'ir ka chahiye ke is fursat ko ghaneemat samjhe aur taubah wa inaabat aur arz-e-haajaat mein kotaahi na kare. Aan Hazrat ki ziyarat ke zail mein bahut si du'a'ein behtareen mazaameen ke saath waarid hui hain. Agar hamari binaa ikhtisaar na hoti to chand ek ka zikr zaroor kiya jaata lehaza behtar yeh hai ke jahan tak mumkin ho Sahifah-e-Kaamilah ki du'a'ein padhe jo behtareen du'a hai. Aur hum is baab ke aakhir mein Ziyaaraat-e-Jaami'ah ke baad ek du'a aur naql karenge jo tamaam mashaahid-e-muqaddasah mein padhi jaa sakti hai aur is liye ke yeh jagah bhi khaali na reh jaaye ek mukhtasar du'a naql kiye de rahe hain jo ek ziyarat ke zail mein waarid hui hai aur woh yeh hai ke Haram Mubaarak mein haathon ko aasmaan ki taraf buland kar ke kahe.