Fazilat wa Aadaab Turbat Imam Husain a.s.
Waazih rahe ke is silsila mein muta'addid riwaayaat waarid hui hain ke khaak-e-qabr Imam Husain a.s. maut ke alaawa har dard ka ilaaj hai aur har bala se bachaane ka zariya aur har khauf mein amn ka waseela hai. Is silsila mein riwaayaat mutawaatir hain aur is se jo mo'jizaat zaahir hue hain woh bhi bayan se baahar hain. Maine apni kitaab Fawaa'id-ur-Razawiyyah mein jo ulamaa-e-Shi'a ke haalaat mein se hai Muhaddith Buzurg Aaqa'i Sayyid Ni'matullah Jazaa'iri ke haalaat mein likha hai ke unhon ne tehseel-e-ilm mein be-had zehmaten bardaasht kein aur be-hisaab masaa'ib ka saamna kiya aur awa'il-e-ta'leem mein un ke paas roshni ka bhi intezaam nahin tha to chaand ki roshni mein mutaal'a kiya karte the jis ki bina par un ki aankhein padhne se is qadar za'eef ho gayi thin ke woh roshni chashm ke liye khaak-e-qabr Imam Husain a.s. aur khaak-e-mashaahid-e-musharrafa Aimma-e-Iraq ko ba-taur-e-surma istemaal karte the jis ki barkat se un ki aankhon ki beenaa'i theek ho gayi aur maine yeh bhi likha hai ke aisa na ho ke aaj kal ke log kuffaar aur be-deenon ke saath mu'aasharat ki bina par is mas'ala mein shak karne lagen jab ke Kamaal-ud-Deen Dameeri ne Hayaat-ul-Haywaan mein naql kiya hai ke saanp ki umr jab hazaar saal ho jaati hai to us ki aankhein andhi ho jaati hain aur Parwardigaar us ko yeh ilhaam karta hai ke apni aankh ko falaan ghaas par jis ko Raaziyaanaj kehte hain mal de to us ki beenaa'i palat aayegi aur woh us ghaas ki talaash mein nikal padta hai aur chahe kitni hi taweel musaafat ho apne ko wahaan pahuncha deta hai aur apni aankhon ko is ghaas par mal deta hai jis se us ki roshni palat aati hai. Is baat ko Allama Zamakhshari ne bhi naql kiya hai. To agar Parwardigaar ek ghaas mein yeh khaasiyat paida kar sakta hai ke andhe saanp ko beena bana de to is baat par ta'ajjub hai ke Parwardigaar Farzand-e-Rasool (S) ki turbat mein is se behtar taaseer paida kar de jis ne raah-e-Khuda mein apna saara ghar lutaa diya. Is khaak-e-muqaddas ke woh fawaa'id wa barakaat hain ke jin se chaahne walon ne be-shumaar faayde uthaaye hain aur yahan sirf chand riwaayaat ki taraf ishaara kiya ja raha hai.
1. Riwayat mein hai ke Hooraan-e-Behisht jab malaa'ika ko dekhti hain ke woh kisi kaam ke liye zameen ki taraf jaa rahe hain to un se iltemaas karti hain ke hamare liye tasbeeh wa khaak-e-qabr Imam Husain a.s. ba-taur-e-hadiya le aayen.
2. Sanad mo'tabar ke saath manqool hai ke ek shakhs ne bayan kiya ke Imam Raza a.s. ne mere waaste Khuraasaan se ek saamaan ka thaila bheja. Jab maine khola to dekha ke us mein ek khaak bhi hai. Maine laane waale se poochha ke yeh kya hai? Us ne kaha ke yeh Khaak-e-Qabr-e-Imam Husain a.s. hai. Aur Hazrat jab koi libaas ya ghair libaas kisi ko bhejte hain to us mein yeh khaak zaroor rakhte hain aur farmate hain ke hukm-e-Khuda se tamaam balaon se amaan ka zariya hai.
3. Riwayat mein hai ke Abdullah bin Abi Ya'foor ne Imam Sadiq a.s. se arz kiya ke "Ek shakhs khaak-e-qabr-e-Imam Husain a.s. ko uthaata hai aur faayda haasil kar leta hai aur doosre ko waisa faayda nahin hota hai?" To Aap ne farmaya ke "Jo shakhs bhi e'temaad sahih rakhta hai us ko yaqeenan faayda hoga."
4. Abu Hamza Sumaali ra se riwayat hai ke maine Imam Sadiq a.s. se arz kiya ke "Main dekhta hoon ke hamare ashaab khaak-e-qabr Imam Husain a.s. ko le kar us se shifa talab kar rahe hain to kya is mein waaqi'an shifa hai?" Farmaya "Beshak jo khaak bhi qabr ke chaar meel ke andar se uthaai jaaye us mein shifa hai aur yahi taaseer Hazrat Rasool (S), Imam Hasan a.s., Imam Zainul Aabideen a.s. aur Imam Muhammad Baqir a.s. ki khaak-e-qabr mein bhi hai ke yeh khaak har tarah se shifa hai aur har bala ke dafa' karne ka zariya hai. Dunya ki koi cheez us ke barabar nahin ho sakti hai siwaaye du'a ke. Albatta jo cheez us ko barbaad kar deti hai woh kisi ghalat jagah par us ko rakh dena hai lehaza jo log is khaak se ilaaj se ilaaj karte hain agar un ka yaqeen wa e'teqaad sahih hai to yaqeenan unhein faayda hoga aur unhein doosri dawa ki zaroorat na hogi lekin kabhi kabhi is khaak ko shayaateen aur jinaat ke kaafir barbaad kar dete hain ke apne ko us par mal dete hain ya us mein koi cheez daal dete hain ke unhein farzand-e-Aadam a.s. se hasad hai aur woh us ki neki aur khushboo ko zaa'il kar dete hain chunanche jab bhi Haram Imam Husain a.s. se koi khaak nikalti hai to shayaateen wa kuffaar jinaat be-shumaar ta'daad mein taiyaar ho jaate hain ke kis tarah is khaak ko saahib-e-khaak se chheen lein ya us ko apne haathon se mas (touch) kar dein ke malaa'ika unhein Haram Imam Husain a.s. mein daakhil nahin hone dete hain. Lehaza agar turbat un logon se mahfooz reh jaaye to har beemaari ka ilaaj kar sakti hai lehaza jab khaak-e-qabr ko uthaaye to use posheeda rakhe aur musalsal us par zikr-e-Khuda karta rahe. Maine suna hai ke ba'z log khaak utha to lete hain magar us ko ma'moooli samajhte hain hatta ke ba'z log jaanwar ke khaane ke saamaan mein ya aisi jagah par rakh dete hain jahaan logon ke haath lagte rehte hain. Zaahir hai ke aise logon ko kis tarah shifa haasil ho sakti hai jo us ko ma'moooli samajhta hai woh khud apne amal ko barbaad kar leta hai.
5. Riwayat mein hai ke jab tum mein se koi shakhs khaak-e-qabr ko uthaana chahe to chutki se uthaaye ek chane ke baraabar uthaaye aur us ko bosa de aur aankhon se lagaaye. Is ke baad apne saare badan par mal le aur yeh kahe.
وَ بِحَقِّ مَنْ حَلَّ بِهَا وَ ثَوٰى فِيْهَا
وَ بِحَقِّ جَدِّهِ وَ اَبِيْهِ
وَ اُمِّهِ وَ اَخِيْهِ
وَ الْاَئِمَّةِ مِنْ وُلْدِهِ
وَ بِحَقِّ الْمَلَاۤئِكَةِ الْحَآفِّيْنَ بِهِ
اِلَّا جَعَلْتَهَا شِفَاۤءً مِنْ كُلِّ دَاۤءٍ
وَ بُرْءًا مِنْ كُلِّ مَرَضٍ
وَ نَجَاةً مِنْ كُلِّ اٰفَةٍ
وَ حِرْزًا مِمَّاۤ اَخَافُ وَ اَحْذَرُ۔
Is ke baad is khaak ko iste'maal kare.
Riwayat mein hai ke turbat Imam Husain a.s. ko mohar karne ka tareeqa yeh hai ke us par Surah Inna Anzalnaahu padha jaaye. Neez riwayat hai ke jo shakhs is khaak ko khaana chahta hai ya kisi ko khilaana chahta hai woh pehle kahe.
بِسْمِ اللّٰهِ وَ بِاللّٰهِ
اَللّٰهُمَّ اجْعَلْهُ رِزْقًا وَاسِعًا
وَ عِلْمًا نَافِعًا
وَ شِفَاۤءً مِنْ كُلِّ دَاۤءٍ
اِنَّكَ عَلٰى كُلِّ شَيْءٍ قَدِيْرٌ۔
Mu'allif ka bayan hai ke is turbat shareefah ke fawaa'id bahut hain jin mein se ek yeh bhi hai ke mustahab hai ke use mayyit ke saath qabr mein rakha jaaye aur kafan ko isi se likha jaaye aur phir isi par sajda kiya jaaye ke khaak-e-shifa par sajda saaton hijaabaat ko utha deta hai aur namaz ki qabooliyat ka zariya ban jaata hai. Is khaak se tasbeeh banaana aur us par zikr karna aur us ko apne haathon mein rakhna bhi fazeelat rakhta hai. Is ki khaasiyat yeh hai ke woh khud tasbeeh-e-Parwardigaar karti rehti hai chahe saahib-e-tasbeeh tasbeeh kare ya na kare. Aur waazih rahe ke yeh tasbeeh us tasbeeh ke alaawa hai jo fitri taur par saari kaainaat ke zarraat karte hain jaisa ke Parwardigaar ne farmaya hai.
Aarif Roomi ne isi mafhoom ko yoon bayan kiya hai:
Agar tumhare paas nigaah-e-ghaib aashna hoti | Aur tumhare saath dunya ke zarraat hum raaz hote
To tum khaak aab mitti ke | Nutq ko bhi mehsoos kar lete
Ke tamaam zarraat-e-aalam khaamoshi ke | Saath subh wa shaam keh rahe hain
Ke hum sama'at wa basaarat wa hosh rakhte hain | Aur tum naa-mahramon ke saamne khaamosh rehte hain
Agar tum jammaadaat ke saath yak rang ho jao | To ajzaa-e-aalam ke ghalghala ko sun sakte ho
Saaf tasbeeh jammaadaat ki aawaaz aa rahi hai | Sirf waswase ta'weelon mein izafa kar dete hain
سُبْحَانَ اللهِ
وَ الْحَمْدُ لِلّٰهِ
وَ لَاۤ اِلٰهَ اِلَّا اللهُ
وَ اللهُ اَكْبَرُ۔
Yeh tasbeeh jis ka zikr is riwayat mein hai yeh khusoosiyaat khaas qabr Sayyid-ush-Shuhada a.s. mein hai.
6. Imam Raza a.s. se manqool hai ke jo shakhs tasbeeh khaak-e-shifa haath mein le kar kahe
To har daana par Khuda-wand Aalam us ke liye chheh hazaar nekiyan likhega aur chheh hazaar gunaah mahv kar dega aur chheh hazaar darajaat buland kar dega aur chheh hazaar afraad ki shafa'at ka haq de dega. Imam Sadiq a.s. se manqool hai ke jo shakhs qabr-e-Imam Husain a.s. ke sang-rezo se tasbeeh banaaye aur ek martaba istighfaar kar le to us ke liye sattar martaba istighfaar likha jaata hai aur agar tasbeeh haath mein liye rahe aur khud kuch na padhe to har daana ki saat martaba tasbeeh darj ki jaati hai.
7. Hadees mo'tabar mein hai ke Imam Sadiq a.s. Iraq tashreef laaye to ek giroh Aap ke paas haazir hua aur kaha ke "Hum ne suna hai ke turbat Imam Husain a.s. har dard se shifa ka ba'is hai. Kya khauf se hifaazat ka sabab bhi hai?" Farmaya "Beshak agar koi shakhs chahta hai ke woh har khatra se mahfooz rahe to use khaak-e-qabr Imam Husain a.s. ki tasbeeh bana kar apne haath mein rakhna chahiye aur teen martaba is du'a ko padhna chahiye."
اَصْبَحْتُ [اَمْسَيْتُ] اَللّٰهُمَّ مُعْتَصِمًا بِذِمَامِكَ وَ جِوَارِكَ الْمَنِيْعِ
الَّذِيْ لَا يُطَاوَلُ وَ لَا يُحَاوَلُ
مِنْ شَرِّ كُلِّ غَاشِمٍ وَ طَارِقٍ
مِنْ سَاۤئِرِ مَنْ خَلَقْتَ وَ مَا خَلَقْتَ
مِنْ خَلْقِكَ الصَّامِتِ وَ النَّاطِقِ
فِي جُنَّةٍ مِنْ كُلِّ مَخُوْفٍ
بِلِبَاسٍ سَابِغَةٍ حَصِيْنَةٍ
وَ هِيَ وِلَاۤءُ اَهْلِ بَيْتِ نَبِيِّكَ
عَلَيْهِمُ السَّلَامُ مُحَمَّدٍ صَلَّى اللّٰهُ عَلَيْهِ وَ اٰلِهِ
مُحْتَجِزًا [مُحْتَجِبًا] مِنْ كُلِّ قَاصِدٍ لِيۤ اِلٰۤى اَذِيَّةٍ
بِجِدَارٍ حَصِيْنٍ
۟اِلْاِخْلَاصِ فِيْ الْاِعْتِرَافِ بِحَقِّهِمْ
وَ التَّمَسُّكِ بِحَبْلِهِمْ جَمِيْعًا
مُوْقِنًا اَنَّ الْحَقَّ لَهُمْ وَ مَعَهُمْ
وَ مِنْهُمْ وَ فِيْهِمْ وَ بِهِمْ
اُوَالِيْ مَنْ وَالَوْا
وَ اُعَادِيْ مَنْ عَادَوْا
وَ اُجَانِبُ مَنْ جَانَبُوْا
فَصَلِّ عَلٰى مُحَمَّدٍ وَ اٰلِهِ
وَ اَعِذْنِيْ اَللّٰهُمَّ بِهِمْ
مِنْ شَرِّ كُلِّ مَاۤ اَتَّقِيْهِ يَا عَظِيْمُ
حَجَزْتُ الْاَعَادِيَ عَنِّيْ بِبَدِيْعِ السَّمَاوَاتِ وَ الْاَرْضِ
اِنَّا جَعَلْنَا مِنْ بَيْنِ اَيْدِيْهِمْ سَدًّا
وَ مِنْ خَلْفِهِمْ سَدًّا
فَاَغْشَيْنَاهُمْ فَهُمْ لَا يُبْصِرُوْنَ۔
Is ke baad tasbeeh ko bosa de kar aankhon par mile aur kahe
اَللّٰهُمَّ اِنِّيۤ اَسْاَلُكَ بِحَقِّ هٰذِهِ التُّرْبَةِ الْمُبَارَكَةِ
وَ بِحَقِّ صَاحِبِهَا
وَ بِحَقِّ جَدِّهِ وَ بِحَقِّ اَبِيْهِ
وَ بِحَقِّ اُمِّهِ وَ بِحَقِّ اَخِيْهِ
وَ بِحَقِّ وُلْدِهِ الطَّاهِرِيْنَ
اجْعَلْهَا شِفَاۤءً مِنْ كُلِّ دَاۤءٍ
وَ اَمَانًا مِنْ كُلِّ خَوْفٍ
وَ حِفْظًا مِنْ كُلِّ سُوۤءٍ۔
Is ke baad tasbeeh ko apni peshaani par rakhe. Agar subh ko aisa karega to shaam tak amaan mein rahega aur shaam ko aisa karega to subh tak mahfooz rahega. Doosri riwayat mein hai ke jo shakhs kisi baadshah ya kisi zaalim se darta ho to ghar se baahar nikalte waqt yahi tareeqa ikhtiyaar kare to us ke har shar se mahfooz rahega.
Mu'allif: Ulamaa-e-Kiraam ke darmiyaan mash'hoor hai ke kisi bhi khaak ka khaana jaa'iz nahin hai magar turbat qabr Imam Husain a.s. ko lazzat ke bajaaye shifa ki niyat se ek chane ke baraabar khaaya jaaye to koi harj nahin hai bal ke ehtiyaat yeh hai ke ek masoor ke daana ke baraabar ho aur us mein bhi behtar yeh hai ke munh mein rakh kar paani se utaar li jaaye aur yeh kahe.
اَللّٰهُمَّ اجْعَلْهُ رِزْقًا وَاسِعًا
وَ عِلْمًا نَافِعًا
وَ شِفَاۤءً مِنْ كُلِّ دَاۤءٍ وَ سُقْمٍ۔
Allama Majlisi ra ka irshaad hai ke ehtiyaat yeh hai ke khaak-e-paak ki tasbeeh wa sajda gaah ki khareed wa farokht na kare bal ke donon taraf se jins aur qeemat ko ba-taur-e-hadiya de diya jaaye bashartike pehle se koi shart na ho jaisa ke hadees mo'tabar mein Imam Sadiq a.s. se manqool hai ke "Jis shakhs ne khaak-e-qabr-e-Imam Husain a.s. ko farokht kiya goya ke Hazrat ke gosht ki khareed wa farokht ki."
Mu'allif: Hamare ustaad Aalim-e-Mutabahhir Muhaddith Azeem Siqat-ul-Islam Nuri ra ne Daar-us-Salaam mein farmaya ke ek din mere bhaiyon mein se ek ko waalida-e-muhtarama ne dekh liya ke woh turbat Imam Husain a.s. ko qubaa ki neeche ki jaib mein rakhe hain to unhon ne intehaai sakht tanbeeh ki aur farmaya ke yeh khaak-e-paak ki be-adabi hai. Ho sakta hai ke yeh raan ke neeche dab kar toot jaaye to bhai ne kaha ke aisa do martaba ho chuka hai lekin ab aaindah aisa nahin karunga. Chunanche us ke baad mere waalid buzurgwaar ne khwaab mein dekha jab ke unhein is waaqi'a ki ittila' bhi nahin thi ke Imam Husain a.s. mulaqaat ke liye tashreef laaye hain aur kutub khaane ke kamra mein baith kar intehaai mohabbat ka izhaar farma rahe hain. Is ke baad Aap ne farmaya ke "Apne bachchon ko bulaao." Aap ne tamaam bachchon ko talab kiya jin mein hum paanch bhai the aur sab Hazrat ke saamne khade ho gaye. Aap ke paas libaas aur kuch cheezein aur thin. Aap ne ek ek ko bulaa kar koi na koi cheez de di lekin jab hamare bhai ki naubat aayi to Aap ne un ki taraf ghussa se nigaah ki aur waalid se farmaya ke "Yeh tumhara beta hai. Is ne hamare khaak ki do sajda gaahon ko apni raan ke neeche tod diya hai" aur yeh keh kar Aap ne doosre bhaiyon ki tarah talab karne ke bajaaye door se koi cheez phenk di jo ghaaliban mere khayaal ke mutaabiq kanghi ka dibba tha. Is ke baad waalid mohtaram khwaab se bedaar hue to unhon ne is khwaab ko waalida-e-muhtarama se naql kiya aur unhon ne apna qissa waalid se bayan kiya aur unhein apne khwaab ki sadaaqat par be-had ta'ajjub hua.
