Namaz Āyāt

Namaz Āyāt jis ke padhne ka tareeqa ba'd mein bayan hoga teen cheezon ki wajah se wājib hoti hai:

1. Sūraj girhan

2. Chānd girhan

3. Agarche un ke kuch ḥisse ko hi girhan lage aur khwāh insān par us ki wajah se khauf bhi ṭārī na hua ho to phir bhi Namaz Āyāt wājib hai.

4. Zalzala (earthquake) eḥtiyāṭ-e-wājib ki binā par agarche us se koi bhi khauf zadah na hua ho. Albatta bādalōn ki garaj, bijlī ki kaṛak, surkh wa siyāh āndhī aur inhi jaisi doosri āsmānī nishāniyān jin se aksar log khauf zadah ho jaayen aur isi tarah zameen ke ḥādisāt masalan zameen ka dhans jaana aur pahaaṛ ka ṭukṛe ṭukṛe ho jaana jin se aksar log khauf zadah ho jaate hain un ṣūraton mein bhi eḥtiyāṭ-e-mustaḥab ki binā par Namaz Āyāt tark nahin karni chahiye.

Namaz Āyāt Padhne ka Tareeqa

Mas'ala 1486 Namaz Āyāt ki do raka'atein hain aur har raka'at mein paanch rukū' hain. Us ke padhne ka tareeqa yeh hai ke niyat karne ke ba'd insān takbīr kahe aur ek daf'ā Ḥamd aur ek poora sūrah padhe aur rukū' mein jaaye aur phir rukū' se sar uṭhāye phir dobaarah ek daf'ā Ḥamd aur ek sūrah padhe aur phir rukū' mein jaaye. Is 'amal ko paanch daf'ā anjām de aur paanchwein rukū' se qiyām ki ḥālat mein aane ke ba'd do sajde baja laaye aur phir uṭh khaṛā ho aur pehli raka'at ki tarah doosri raka'at baja laaye aur tashahhud aur salām paṛh kar namaz tamām kare.

Mas'ala 1487 Namaz Āyāt mein yeh bhi mumkin hai ke insān niyat karne aur takbīr aur Ḥamd paṛhne ke ba'd ek sūre ki āyaton ke paanch ḥisse kare aur ek āyat ya us se kuch zyada paṛhe bal ke ek āyat se kam bhi paṛh sakta hai lekin eḥtiyāṭ ki binā par zaroori hai ke mukammal jumla ho aur sūrah ke shuru se ibtedā' kare aur “Bismillāh” kehne par iktifā na kare aur us ke ba'd rukū' mein jaaye aur phir khaṛā ho jaaye aur Ḥamd paṛhe baghair isi sūrah ka doosra ḥissa paṛhe aur rukū' mein jaaye aur isi tarah is 'amal ko dohrāta rahe ḥattā ke paanchwein rukū' se pehle sūre ko khatm kar de. Masalan Sūrah Falaq mein pehle Bismillāh ir-Raḥmān ir-Raḥīm Qul a'ūzu bi-rabb-il-falaq paṛhe: aur rukū' mein jaaye. Us ke ba'd khaṛā hua aur paṛhe: Min sharri mā khalaq aur dobaarah rukū' mein jaaye aur rukū' ke ba'd khaṛā hua aur paṛhe: Wa min sharri ghāsiqin idhā waqab phir rukū' mein jaaye aur phir khaṛā hua aur paṛhe: Wa min sharri an-naffāthāti fī al-'uqad aur rukū' mein chala jaaye aur phir khaṛā ho jaaye aur paṛhe: Wa min sharri ḥāsidin idhā ḥasad aur us ke ba'd paanchwein rukū' mein jaaye aur rukū' se khaṛā hone ke ba'd do sajde kare aur doosri raka'at bhi pehli raka'at ki tarah baja laaye aur us ke doosre sajde ke ba'd tashahhud aur salām paṛhe aur yeh bhi jā'iz hai ke sūre ko paanch se kam ḥissōn mein taqsīm kare lekin jis waqt bhi sūrah khatm kare lāzim hai ke ba'd waale rukū' se pehle Ḥamd paṛhe.