Fazilat wa Kaifiyat Ziyarat Shāh Abdul Azīm a.s.

2. Imam Zada-e-Lāzim-ut-Ta'zīm Hazrat 'Abdul 'Azīm jin ka nasab shareef chaar waaston se Imam Sibṭ-e-Akbar Hazrat Imam Hasan Mujtaba a.s. tak pahunch jaata hai. 'Abdul 'Azīm bin 'Abdullāh bin 'Alī a.s. bin al-Ḥasan a.s. bin Zayd bin al-Ḥasan a.s. bin 'Alī a.s. bin Abī Ṭālib Alaihimussalam Aap ki qabr shareef sheher Ray mein mash'hoor wa ma'roof aur malja'-e-'awām wa khawāṣṣ hai. Aap ki bulandi-e-maqaam aur jalaalat-e-shaan azhar min ash-shams hai alaawa is ke ke Aap khandaan-e-Khātam-un-Nabiyyīn mein hain aur Aap ka shumaar akābir muhaddithīn wa 'ulamā wa zuhād wa huffāẓ wa ṣāḥibān-e-taqwā mein hota hai. Aap Imam Hādi a.s. wa Imam Jawād a.s. ke aṣḥāb mein the aur in hazraat ke saath kamāl-e-tawassul wa taqarrub rakhte the. In se bahut si riwaayaat bhi naql ki hain aur Aap hi woh hain jinhon ne Khuṭab-e-Amīr-ul-Momineen a.s. aur Kitāb Yawm wa Laylah tehreer farmaai hai aur Aap hi woh hain jinhon ne apne poore deen ko Imam Hādi a.s. ke saamne pesh kiya tha aur Hazrat ne us ki tasdeeq karte hue farmaya tha ke "Abul Qaasim Khuda ki qasam yahi woh deen hai jis ko Khuda ne bandon ke liye pasand kiya hai aur isi par saabit qadam rehna hai Allah un ko dunya wa aakhirat mein qaul-e-saabit ke saath sabāt 'ināyat farmaaye." Ṣāḥib bin 'Abbād ne Aap ke haalaat mein ek mukhtasar risaala bhi likha hai jis ko hamare ustaad Siqat-ul-Islam Nūrī ra ne Khātimat Mustadrak mein naql kar diya. Apne zamaane ke baadshah ke khauf se faraar ikhtiyaar kiya aur shehron mein gardish karte rahe yahan tak ke Maqām-e-Ray tak pahunche aur apne ko saarbānon ke andar makhfī kar liya aur riwayat-e-Najāshī ki binā par ek mard-e-Shī'a ke makaan ke teh khaana mein Sikkāt-ul-Mawālī mein qiyām farmaya jahaan musalsal 'ibādat-e-Khuda karte rehte. Dinon ko roza rakhte raaton ko namazein padhte aur khaamoshī se baahar nikalte the aur ek qabr ki ziyarat karte the jo aaj un ki qabr ke saamne hai aur farmaya karte the ke "Farzandān-e-Imam Musa a.s. mein se ek buzurg ki qabr hai" wahin par raha karte the aur sirf ek do afraad ko Aap ke haalaat ki ittila' thi yahan tak ke Ray ke aksar logon ne Aap ko pehchaan liya aur Shī'on mein se ek shakhs ko Sikkāt-ul-Mawālī se uthaaya jaayega aur wahin dafn kar diya jaayega ek saib ke darakht ke paas 'Abdul Jabbār bin 'Abdul Wahhāb ke bāgh mein aur us ke baad us jagah ki taraf ishaara farmaya jahaan aaj bhi yeh qabr maujood hai. Us shakhs ne jaa kar us darakht aur us jagah ko saahib-e-bāgh se khareed liya aur jab us ne poochha ke tum kyun khareed rahe ho to us ne apne khwaab ko naql kiya jis ke baad saahib-e-bāgh ne kaha ke "Maine bhi aisa hi khwaab dekha hai" aur "Maine is jagah ko aur is bāgh ko waqf kar diya hai is Sayyid Jaleel-ul-Qadr aur tamaam Shī'on ke liye ke apne murdon ko wahaan dafn karein." Is ke baad Hazrat 'Abdul 'Azīm beemār hue aur Maalik ki baargāh mein pahunch gaye. Jab ghusl dene ke liye libaas ko utaara gaya to dekha gaya ke Aap ki jaib mein ek ruq'a hai jis mein Aap ne apne nasab ko yoon likha tha ke "Main Abul Qāsim 'Abdul 'Azīm bin 'Abdullāh bin 'Alī bin Ḥasan bin Zayd bin Imām Ḥasan a.s. bin 'Alī a.s. bin Abī Ṭālib Alaihimussalam hoon." Ṣāḥib bin 'Abbād ne Aap ke 'ilm ke baare mein yeh likha hai ke Abū Turāb Rawyānī ne riwayat ki hai ke maine Abū Hammād Rāzī se suna hai ke woh keh rahe the ke "Main Imam Ali Naqi a.s. ki khidmat mein Saamarra mein waarid hua aur maine Hazrat se kuch masaa'il-e-ḥalāl wa ḥarām daryaaft kiye to Aap ne mere masaa'il ke jawābāt diye aur jab maine Hazrat ko alwidā' keh kar nikalna chaaha to Aap ne farmaya ke "Tumhare liye agar koi mas'ala mushkil ho to use 'Abdul 'Azīm bin 'Abdullāh Ḥasanī se daryaaft kar lena aur mera salām pahuncha dena." Muḥaqqiq Dāmād ra ne Kitāb Rawāshiḥ mein farmaya hai ke Ziyarat 'Abdul 'Azīm ke baare mein bahut si hadeesein waarid hui hain aur yeh bhi waarid hua hai ke us ki jazā yeh hai ke Aap ke zā'ir ke liye Jannat wājib ho jaati hai. Sheikh Shahid Saani ra ne apne ḥawāshī isi riwayat ke khulaasa ko ba'z 'ulamā wa ansāb se naql kiya hai aur Ibn-e-Bābawayh aur Amīn Qawlawayh ne mo'tabar sanad se riwayat ki hai ke ek shakhs Ahl-e-Ray mein se Imam Ali Naqi a.s. ki khidmat mein haazir hua Aap ne us se poochha ke "Tum kahan the" us ne kaha ke "Main Ziyarat-e-Imam Husain a.s. ke liye gaya hua tha." Farmaya ke "Agar tum qabr Hazrat 'Abdul 'Azīm ki ziyarat kar lete to tum ko wahi sawaab mil jaata jo Ziyarat Imam Husain a.s. ka tha."